اولان گونونده نشان ویردی عشقیده وَلَهین ئولنده باغرینا باسدی حسین پیرهنین او پیرهنده نه وار ای تمامِ عالمه رب فقط اوزون بیلوسن بیردع باغریقان زینب اولوبدولا متحیّر او غملی احواله گلوب سویوندورا پالتالارینی غسّاله خبر ویروبدیله حاضر اولوب او دم تابوت نظر جنازیه هر کیم ساولوب اولوب مبهوت بدن یانوب قرالوبدور بونا ندور علّت نه قدر غم چکوب آیا بو معدنِ عصمت بولوبدولر که اولار غملی بیر اثر یریدی بدنده شمر ووران تازیانه لر یریدی گوروبدولر گوگروبدور وجودی سرتا پا ندور سبب بو گوگرمالقدا آه و وا ویلا بو غملو واقعه نی #طوریا قوتار یازما دولان مدینیه گیت راه و جادّه نی آزما ✍منکلام:مرحوم استادحاج حسین طوری تبریزی ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

مدح حضرت زینب سلام الله علیها زینبون غربتده قارداش جان ویرور جان آختارور گوزلری گوزلور یولون جان اوسته جانان آختارور زینبون غربتده قارداش جان ویرور جان آختارور گوزلری گوزلور یولون جان اوسته جانان آختارور ای وجودون دستگاه آفرینشدن غرض جوهر ذاتون قبالینده یارانمشلار عرض گَلمیشم سن جان ویرنده سنده گَل ایله عوض مهربانین بو چتین ساعت هر انسان آختارور بیر سنون من تار عشقونله وفا پابستیم سندن اوتری مین لریله غم الیندن خستیم سنده یاد ایله منی بو صون نفس جان اوستیم آخِر ای روحیم سنی بو قالب جان آختارور صبحیم عاشورا گونوندن گوزده شام اولموش منیم سن باتان گوندن قانا قان باغریما دولموش منیم لاجرم چوخداندی عمریم گلشنی سولموش منیم بو سولان گُل ای گُلیم سندن بهاران آختارور حس فطریدور سُوَر هر باجی اوز قارداشینی آغلیاندا هر باجی قارداش سیلر گوزیاشینی باجی جان ویرسه آلار قارداش دیز اوسته باشینی باجی قارداشدان همیشه لطف شایان آختارور سایه ی لطفون برادر لطف ایله سال باشیمه باخ فراقوندا عذاریمده بو قان گوزیاشیمه قالموشام حسرت سنون تک مهربان قارداشیمه ای گوزوم نوری سنی بو چشم گریان آختارور گوزلریم هر لحظه قارداش انتظاروندور سنون اللریم سینمده جان تک ساخلیوب پیراهنون آرزو ایلردیم اولسون خوابگاهیم مدفنون بو دل محروم وصلوندن نه حِرمان آختارور یوخدی غربتده یانیمدا بیر نفر اهل وطن گوزلریم قالموش یولوندا نه گَلَن وار نه گیدن ایمدی بُلدوم نه چَکَر غربتده یالقوز جان ویرن یاندیرار دنیانی آه آتش افشان آختارور منتها اخلاصیله پیمانیمه ایتدیم وفا ثابت اولدوم عهدیم اوسته هر یانا چَکدی قضا هر بلا و محنته صبر ایلدیم ویردیم رضا چون بُلوردوم ارتضانی حَیِّ سبحان آختارور ایتمدیم راه وفاده ذرّه جه دلدن گِله باغ محنتدن دَروب هر غم گُلون یغدیم اَله نخله ی اندوه و غم ایمدی یِتوبدی حاصله بیر یارالی باغبان بو دل پریشان آختارور گَل اوزون بو صون نفسده گور باجون احوالینی لطف الیله سیل یوزومدن قان سرشک آلیمی ایلرم ظاهرده گرچه مرگین استقبالینی زینبون جان بذلینه بیر اهل قرآن آختارور ای یوزی آئینه ی قدرت نمای ذوالمَنَن بو کنیش دنیا ایوی سنسیز منه بیتُ الحزن ای وجودی بی کفن گَل زینبه ایله کفن احتضار حالینده زینب لطف و احسان آختارور دیو سیرت لر جفاسی الدن آلموش اختیار دلده سوزِ نارِ هجران گوزده اشک لعل وار بو بساطِ احتشامین باده ویرموش روزگار مور تک جان تحفه سی الده سلیمان آختارور گیتمیوب دلدنبرادر دلده کی مهر و فا آدیوی ذکر ایلدوقجا دل تاپار ذوق و صفا جان ویرنده سو دیدون سو ویرمدی اهل جفا زینبون گوز کاسه سین دولدورموش عطشان آختارور زینبم قارداش یولوندا تیر غم آماجیم قتلگهده قانیوی زلفه یاخان بیر باجیم ایمدی آخِر عمریده بیر لطفوین محتاجیم صون نفسده زینبون لطف فراوان آختارور قتلگهده من گَلَنده یانوا عطشانیدون فرش خاکِ تیره اوسته قانیوه غلطانیدون گون قباقینده یارالی جسمیله سوزانیدون قتلیوه گوردوم که قاتل تیغ برّان آختارور جان ویرنده سن یارالی توپراق اوسته دل کباب واقعاً جای عجبدور اولمادی عالم خراب غرق ظلمت ایتدی دنیانی گوروب تا آفتاب حنجرون خنجر دمیندن آبِ حَیوان آختارور آند ویرّم من سنی زینب حسین قارداشیوه قارداشوندان اوتری بیر عمری آخان گوز یاشیوه ایسته گَلسون #سائل و #سالک دولانسون باشیوه قبریوی بیر عمریدور بو ایکّی نالان آختارور ✍منکلام:مرحوم استادحاج عبدالعظیم ذهنی زاده تبریزی متخلص به سائل ✍منکلام:مرحوم استاد میرزا حسن سالک متخلص به سالک 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

زبانحال حضرت زینب سلام الله علیها گل زینبی جان اوسته ملاقات ایله قارداش بیکس باجیوی غرق مباهات ایله قارداش من بیر ایله وحشتلی بیاباندا حسینجان دوتدوم سو کنارینده سنه شام غریبان هر چند عوضین ایستمورم ای شه خوبان قارداشلیقیوی عالمه اثبات ایله قارداش بو علّته جان اوسته آنام چوخ کدر اولدی اوغلی واریدی، قارداشی یوخ دیده تر اولدی امّا باجیوین اُلماقی اوندان بتر اولدی قارداشسیز اوغولسوزدی مراعات ایله قارداش سن اولما رضا زار و غریبانه گیدم من آیری قاپیا چاره و درمانه گیدم من عالم نه دیر قبره غریبانه گیدم من بیر لحظه ولو کشف و کرامات ایله قارداش بختیم یاتوب البتّه که یاتسون نه سوزوم وار گر غصّ] بوکوب قدّیمی قلبیمده دوزوم وار آخِر صله ارحامه گوره سنده گوزوم وار غربتده اُلن باجیوه خیرات ایله قارداش ای زینبین آرامی اوغولسوز باجون اُلسون گر سیر ایله بیر شامی اوغولسوز باجون اُلسون گور باشداکی غوغامی اوغولسوز باجون اُلسون بیت الحزنی روضه ی جنّات ایله قارداش جان خسته دی دردیم گیچوب افسرده دوادن بیر طاقه کفن آل منه بازار بلادن باغلا بیر اووج گوشه سینه خاک شِفادن اوز تربتیوی افضل سوغات ایله قارداش عبّاسه یتور خواهشیم ای شاه خجسته آخِر دینن ای سرو سر و دست شکسته نفسونله مواسات ایلدون دین حق اوسته اللهه گوره بیرده مواسات ایله قارداش شام اهلی دیور هیچ بونا بیر ال یتورن یوخ ائل صاحبیدور دردینه درمان گتورن یوخ وار یتدی نفر قارداشی یردن گوتورن یوخ دشمن گوزینه باری عنایت ایله قارداش ✍منکلام:مرحوم استادحاج رحیم منزوی اردبیلی 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

مدح حضرت زینب سلام الله علیها گر ایسته سه بله هر کیم محبته آمار گرک محبت زینبدن اخذ ایده معیار مدینه دن که او گون دوشدی قارداش آردینجا او هر قدمده اولوب قارداشا شریک اسرار نه چکدی کرببلاده او بانوی عصمت نه ظلملر ایلیوب کوفیان کینه شعار حسینیدن صورا اون دوقوز آی قالوب بو خانم واریمدی بو سوزیمه الده معتبر اخبار حسینیدن صورا هر گون خانملارین بیریسی مصائبین او شهین بیر بیر ایتدیلر اظهار عزا مجالسی اولموشدی سربسر ایولر ایدردی ناله خواتین دیده سی خونبار یازوب بو قصه نی حاکم یزید ملعونه سنون ریاستیوه بُل بو قصد صدمه وورار گوتوردی والی یَه یازدی یزید برنامه دایانما زینبی تبعید ایله اوزون زینهار یتوردی بو سوزی زهرا عزیزینه والی ایشیق گونوز اولوب علیا جنابه لیله تار دیدی آنام کیمی چوللرده ایلرم افغان حسینه لازمه دور منده جان ایدم ایثار گوتوردی بیر نچه بانو مجلله همراه مشایعت ایلدی اهل شهر خورد و کبار بو قصه دن اولوب آگه او گون که والی مصر دیدی گرک هامی پیشواز ایده صغیر و کبار حسین باجیسی بو شهره ایلوری اجلال کجاوه سینه اونون ایلیون گلاب نثار دوشوبدی والی کجاوه یانینجا مثل غلام گوروم اولا ایکی دنیا یزید بیدین خوار خلاصه بیر نچه گون مصریده صباح و مسا توکردی گوز یاشی گل عارضینه همچون ثار یتوشدی ماهِ رجب روز شنبه اون دوردی غروب وقتی اولوب روحی جسمیدن چو کنار وقایه ایلدی روحین حسینه جان ویردی اونون او حالینه یکسر خانملار آغلادیلار اونون او غربتی ایله نشست ایتدی دله گلوبدی نالیه یکسر او دم در و دیوار گلوبدی غسلینی ویرسون او دمده غساله نه گوردی سینه ده اوز اللری او کان وقار کنار ایدنده الین گوردی قانلی بیر کوینگ باسوبدی سینه سینه جان کیمی اولوب گلنار چیخاتدی گل بدنیندن لباسینی بیر بیر ساتاشدی گوزلری گوردی بدن اولوب خونبار دیدی بو جسمه گلون سیزده دقتیله باخون ندن بدن گوگروب سرین ایلیون اظهار وورا وورا بونی مقتوله ایلیوبله یقین بو حالی الدن آلوبدور قرار و تاب نه وار دورون ایاقه هامی ناله و فغانیله خرابیه گوزی یاشلی ایداق بر یرده گذار آلوبدی طاقتینی #طورینین بو غم الدن قلم دایاندی صحیفه اود دوتوبدی یانار ✍منکلام:مرحوم استادحاج حسین طوری تبریزی ‍ ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

مدح حضرت زینب سلام الله علیها گل یارالی گور زینبون نیجه عشقین عالمینه نشان ویرور باغرینا باسور قانلو کوینگون باغریقان جگر داغلی جان ویرور هرقدرکه سندن صورا حسین عمر ایدوب بو دنیاده قالموشام نه یوزوم گلوب بیرنفس منیم آدیوی دلیمدن نه سالموشام لوح دلده تصویریوی گوروب عطریوی بو کوینکدن آلموشام گرچه گل خزان اولسا عطرینی برگ شاخه گل هاچان ویرور هربلا وغم ویردی یوز منه چخمادیم حسین حلم و صبریدن لیک فرقتونده اخا سنون دیده بارشی گیچدی ابریدن گر اولمده من آغلارام سنه نالم اوج ایدر عرشه قبریدن اودلانان دلیله سیزیلدارام منله سس سسه قدسیان ویرور ایلینده غم لشگری هجوم رام ایدوب باجون صبر ناقه سین حال احتضاریمدی جسمدن آز قالور کسه روح علاقه سین زینبون الور گل جنازه سی اوسته باری چک شال طاقه سین یوخ گلن باشی اوسته زینبون بیر سنه حسینیم گمان ویرور سن حسین بولورسن الورباجون واردی قان اولان دلده حسرتی باری گل باشیم اوسته ایتگلن ای یارالی قرآن تلاوتی جان ویرن زماننده خوش گلور یار ایشسته گر یار صحبتی گوز آچوب گوره تسلیت اونا باشی اوسته بیرمهربان ویرور من دیردیم اولسم جنازمی حمل ایدرحسین قبرایاقینه اکبروابولفضل وقاسمیم هم دوشرجنازه م قباقینه قویمادی فلک زینبون یته دلده کی اولان اشتیاقینه عکس آرزومه بو کوینگون تار و پودی شرح و بیان ویرور حال احتضارونده اونداکی دلده ذکرون اولموشدی العطش باشون اوسته گوردون منی اوزون ایلنده شمریله کشمکش اللریم یارالاندی سهلدی قولاریم حسین اولدی نیلی وش دل دنوب قانا اوندا ظاهره ایندی دیده خونفشان ویرور گرچه جان ویرنده سنون حسین باشون اوسته من آغلیانمادیم باجیلارکیمی باش آچوب اوگون ساچ یولوب سینه داغلیانمادیم نسگل اولدی بونکته زینبه گوزلریویده باغلیانمادیم سعی قیلدیم آخراوسعیمی زخم جسم زاریم نشان ویرور من سنون ملال ومصیبتون بیردقیقه باشیمدان آتمادیم سهلدورگیجه گوندوزآغلادیم دردیوی اورکدن چخاتمادیم سن کول اوسته قارداش یاتان گیجه صبح اولونجاهیچ منده یاتمادیم آغلادیم دیدیم هاردا گور عدوقارداشیمایارب مکان ویرور فکروصلویله همان گیجه دل یانوردی نار فراقیده صبح اولاندا گوردوم جداده من باشوی بیر اوزگه سیاقده مه یوزونده خاکستراگلشوب آی قالوبدی گویا محاقده نیزه اوسته چون ماه یک شبه بیربیره نشان کوفیان ویرور زینبه بولوردیم علاقه وی اولندن ای سرورحجاز بیرگیجه ولی آیری دوشماقون آچدی زینبه یاخشی باب راز ایستدون باجون اولماسون خجل ایلدون عجب وقته پیشواز ایلدون منی سرفراز اوگون شرح اونا بو قدی کمان ویرور سن جداده من سوز قلبیله محمل ایچره مشغولیدیم سنه کثرت ایچره تاپموشدی وحدتی زینبون یتشموشدی ایمنه من سنه دیردیم اورکده کی دردیمی اشاره یله سن منه دمبدم گوروردوم او درد دل مرده جسمه روح و روان ویرور حیف اولا جفااهلی ظلمدن بیرزمان آنام اوغلی دویمادی جسمدن تعدی لباسنی قوم کینه بیرلحظه سویمادی بیر دویونجابیز درد دل ایداخ اول عجوزه دهر قویمادی راس پاکوی سالدی زحمته سانمادی اذیت سنان ویرور داش یرین باشوندا گورن کیمی گوزلریمده تار اولدی گوندوزوم باشیمی وروب چوب محمله قالمادی یانان قلبده دوزوم باش یاریلدی باشیمدن آخدی قان قانیله بویاندی یوزوم گوزوم علقه دل زینبی نشان عالمه او زخم و او قان ویرور هرقدربلا یتدی باشوه محنتی ختامه یتشمدی ساعت بلای مقدری شامه دین تمامه یتشمدی غملو گونلری طول چکدی چوخ گون اگلدی شامه یتشمدی شامده ولی بیر گون اولدی شام شرحنی دل ناتوان ویرور کاش حسین یتیدی همان گیجه زینبون بو عمری نهایته اولمییدی یا صبح تازده ن دوشمییدی باشون اذیته سالمییدی گل تک دوداقلارون خیزران اقاجی مشقته فکریمه بو گلمزدی باشیوه بیرده دردسر خیزران ویرور #عاصیا عجب وقته ایلدون زینبه توسل امیدیله جان ویرنده سن قارداشی حسین شاد ایدر یقین خوش نویدیله بیله دور بیری اولسا منتسب بو جهاندا شاه شهیدیله حق اوزی اونا وعده ایلیوب آخرتده اودان امان ویرور ✍منکلام:مرحوم استاد حاج حسن عاصی تبریزی ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

شهادت حضرت زینب سلام الله علیها باجوی آیری سالوبلار وطندن آی قارداش وار انتظاری بو غربتده سندن آی قارداش یوبانما زینب مظلومه نین یامان گونیدی اورگیمون باشینون داغ کیمی یانان گونیدی فدا اولوم سنه جان اوستیم امان گونیدی صله رحم ائله جان اوسته مندن آی قارداش خوشام دانیشدیراسان جان خطاب ائدم سوزیوه دئمه لی دردیمی بیر بیر بیان ائدم اوزیوه آنا گوزینده گوروردون منی فدا گوزیوه عیادت ایله اقلا نه نندن آی قارداش منی حضوریوه ممکن دگول گلن گتورن دیزیمه قدرت و قوت دوباره دن گتورن بو فکرده دگولم یوخ منه کفن گتورن محالدور که سالام سوز کفندن آی قارداش او بلبلم که سالوب چرخ بیر اوزاق چمنه ائدوبدی حسرت دیدار سرو و یاسمنه کفنسیز ئولماقوین دردی درد اولوبدی منه کفن سوزی داخی چیخماز دهندن آی قارداش بی بی سی زینب مظلومه تک غمین اوغلون اسیر دشمن اولوب چوخ ائدن انین اوغلون گوزوم یاشی قورومور زین العابدین اوغلون سنی او کهنه حصیره بوکندن آی قارداش نجه اولا بلی خوشحال اولوم دوباره گولوم محال اولوبدی اچیلسون غمام وش گویلوم بو قانلی کوینگون اولموش الیمده دسته گولوم آلورام عطریوی بو پیرهندن آی قارداش یالان خلافدی شرعا گرک دئماق سوزی دوز ولو ادا ائلماخدا یوزیمه باغلورام ئوز اورک دوگونمه سی منلندی هر گئجه گوندوز آلوب بو کوینگی مندن گییندن آی قارداش جهان طبیب اولا حاشا اولا بو درده دوا ئولومدن اوزگه سی بو حقی ایلینمز ادا گوزیمده جلوه نور ماجرای دشت بلا گوزوم دولور غم و درد و محندن آی قارداش اولور گوزیمده گئچن گونلر آینه گورورم نجه که گورموشدوم تازه دن گینه گورورم دونوب شقایقه اکبر معاینه گورورم گلوبدی دامن دشت و دمندن آی قارداش بیوک گلوب هامی غمدن بو بیر غمون منه چوخ بو محنت اوستونه دنیاده اوزگه محنت یوخ اورک باشین دلور اصغر بوغازینا دگن اوخ آچوب او غنچه دوداقی لبندن آی قارداش چتین اولا بولر عالمده ایله رنج و تعب محققا بلدی یوخدی ذره جای عجب ربابین ئولماقینا سنلن اصغر اولدی سبب آلوب ربابده مشقین گورندن آی قارداش رباب گونلر ائوینده یانوب کباب اولدی مسبّب اولدی که مندنده سلب تاب اولدی منیمده ئولماقیمون باعثی رباب اولدی آیردی ایریلیقی تابی مندن آی قارداش... گل ای باشمدا اولان عزت و شرف تاجی آنام باجیم که دیردون ئولور همان باجی بوصون نفسده اولوب بیر نگاه محتاجی فراق شربتوی نوش ائدندن آی قارداش دیوبدی #حافظی و #هاشمی بو گفتاری که رمز ابجد زینبدی بیت اشعاری مرید و مرشده احسان ایلیوب تاری که سوز سچلموری دُر عدندن آی قارداش. ✍منکلام:استاد هاشمی تبریزی ‍ ✍منکلام:مرحوم استادحاج کریم حافظی تبریزی 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

هی گوتدی سوئی توکدی یره گلدی نوایه آغلار گوزیله دوتدی یوزین کرب و بلایه گویا بیله عرض ایلدی شاهِ شهدایه گل گور یارالی منده سنون تک ویرورم جان تز گل او گلن یوللارا زینب اولا قربان بو سو ، بو باحون بو سویولان کوینک الیمده حسرت باخشیم قارداش آدون واردی دلیمده بو غربت ایوی یوخدی قبیلمده ائلمده گوز پرده سنی گور نجه اوخشاتمشام ابره لطفیله اوزون گل باجوی قوی گینه قبره ای ما خلقین علتی ای مظهرِ صانِع بیگانه لری وی ایلین خالقه قانع من قتلگهه گلدیم اولام قاتله مانع گر دیلده اولان عشقیمی سن بی عرض ایله گل گلماقیما گلماقویله عوض ایله گل بیرده کرم قیل منه عیسا نفسوندن آگهسن اوزون دویمادیم عالمده سسوندن سعی ایلوری روحیم اوچا سنمش قفسوندن از بس قفسوندن گوروب آزار و اذیت گل روحیمی آزاد ایله ای کانِ کرامت قارداش غمی هجری دلینه سالدی شراره بو فکره دوشوب آتش هجره ایده چاره ایستکلریندن اوزونی چکدی کناره گلدی سو کنارینده دایاندی سویا باخدی بو دللریله یاندوروب عالملری یاخدی ای سو نیه آخدون چوله سن کرب و بلاده بیر سندن اوتور آلِ عبا گلدیله داده دوشدی گینه قارداشیم حسین ئولماقی یاده حسرتله دونوب قتلگهدن سنه باخدی آغلار گوزیله بیرده دونوبدی منه باخدی یعنی سویا حسرت باجی سنده باخاجاقسان جان ویرماقون مشقنی مندن آلاجاخسان هر یرده سو گورسون منی یاده سالاجاقسان زینب دگلم راهِ وفا رسمنی گیچسم جان اوسته منه عار اولا سندن اگر ایچسم ✍منکلام: مرحوم استادحاج مجید متین ‍🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅

مدح حضرت زینب سلام الله علیها من عزیز فاطمیم فلک منه حرمتون ندن اولمادی الورم کنار دمشقیده باشیم اوستونه گلن اولمادی رقم ملال و مصیبتیم یازیلا چتیندی قلم قلم بیر حسینیمیدی بلی دین محن زمانیه بیر منم هانی بیر اسیره منیم کیمی آغاروب ساچی اولا قدی خم محنیم کیمی هیچ عزالینون محنی کمر شکن اولمادی غم وغصه دن قوتارور اجل سویورام قبای اسارتی گونی ایل کیمی گچن عمریمون یتیشوبدی آخره ساعتی یری واردی سنگ مزاریمه یازالا بو غملی عبارتی یر اوزونده زینب زار تک یورولوب بلا چکن اولمادی نقدر نفس ویروب آلمیشام او قدر منه یتیشوبدی غم هایانا مسافرت ایتمیشم منیله بلا اولوب همقدم بو جهاندا دینجله بولمدیم گیدورم مزاریده دینجلم باشیم اوسته باش آچا حیف اولا نه حسین و نه حسن اولمادی اریدوبدی غصه وجودیمی نه رمق قالوب نه دوزوم قالوب شرر مصائبه یانمیشام اورگمده اودلی سوزوم قالوب نفسیم دوشوبدی شماریه گنه کربلاده گوزوم قالوب چکورم او توپراقین حسرتین منه حیف اولا وطن اولمادی یورولان مسافره بنزیرم یولون اوسته خار وخس اینجیدوب قنادی سنان قوشا اوخشورام سیخوب اللی ایل قفس اینجیدوب نفسیله خلق خوش اولسادا منی چکدیقم نفس اینجیدیب او نفس که سینمی یاندیروب ولی سوزشین گورن اولمادی ره ابتلانون اوزوم کیمی غمه مبتلاسینی گورمدیم گجه استراحتیم اولمادی سحرین صفاسنی گورمدیم من ئوزوم وفالیم عالمون ابداً وفاسینی گورمدیم گیجه آغلادیم گونوز آغلادیم گوزومون یاشین سیلن اولمادی شهدا غمین اسرا غمین چکوب هر مصیبتی گورموشم الی باشدا مقتله قاچمیشام عمل جنایتی گورموشم کسیلنده قارداشیمون باشی علناً قیامتی گورموشم باخوب آغلادیم کمک ایستدیم منه بیر کمک ایدن اولمادی ستمیله اولدی ورق ورق ایاق آتدا فاطمه نون گلی من آتوردوم ال دم خنجره باشیما یاغوردی بلا کولی رمقی یوخیدی حسینیمون گنه ال گوتورمدی قاتلی یوزی اوسته قالدی جنازه سی دالی اوسته دونده رن اولمادی او حسین که ملک حجازیده هامی گورموشیدی عطاسنی ضعفا غمینده آتام کیمی قوجالوب آغاردی محاسنی چخادوب ویرردی مدینه ده فقرایه تازه لباسنی ایله رادمرد زمانه نون ئوزونه ولی کفن اولمادی ✍منکلام:مرحوم استادحاج قدیر جلیل زادگان متخلص به انور اردبیلی ‍ ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

مدح حضرت زینب سلام الله علیها شاماتیده نشانه ی طاهایه یادگار جان اوسته عرض ایدردی که ای حیّ کردگار ای زینبین گوگلدن آلان اختیارینی یارب یتور منه آنامین یادگارینی قارداشیمی چوخ ایستوری گوگلوم بو صون نفس دفع ایله غصّه لی اورگین غم فشارینی زینب حسینین عشقی سبب اولدی ترک ایده تبعید آدیله موطن و دار و دیارینی نعمتدی جان ویرن آچا گوز جان ویرن زمان اطرافینه باخوب گوره ایل و تبارینی سن وعده ویرموسن ایده سن حاجتین روا هر بنده داده سسلیه پروردگارینی نور دو عین فاطمه نی سندن ایستورم احساس درد یار ایلمز گورسه یارینی دلده بودور نهایت آمالی خواهرین تشییع و دفن ایده قازا قارداش مزارینی سن سالموسان محبّتینی قلبیمه منیم سیل وصل الیله دلده کی هجران غبارینی گوندوز کیمی گوزومده شب تار ایشیقلانار گورسم وفالی قارداشیمون گل عذارینی مدّتدی آیری دوشموشم اوندان عنایت ایت سوندور اوزون گوگلده کی محنت شرارینی گلسون گوروم او تشنه لبین قانلی لبلرین جاری ایدوم او لبلره گوز آبشارینی تنها بودور اورکده اولان آرزو منه لطفاً ویره زیارتینون افتخارینی قربان اولوم حسینه منه روحدور حسین چوخ شائقم ئوپم ایکی چشم خمارینی بیر عمردور منه آدی ورد زبان اولوب دلدن سالام محالدی نام کبارینی عهد ایلورم گلنده سودان صحبت ایتمیم آرتورمیم او غملی دلین آه و زارینی هر کیمسه نین کسیلسه اورک تاری من کیمی سسلر هرای و دادینه هر لحظه تارینی تیغ اجل یاخوندی کسه عمر رشته سین مشکلدی دلده پاره لسون عشق تارینی عشق حسین ئولونجه بو زینب وقاریدور پابوسی گلسه آرتوری زینب وقارینی دل دردی عشق درددی درمانی اوندادور تاپسون بو غربت ئولکه ده درده دچارینی گل صحبتین او گل یوزونی گورسم ایتمرم باد ستم خزان ایلیوب نوبهارینی بیر عمر قارداشیم دیموشم او دیوب باجیم قارداش باجی باشا ویروب اوز روزگارینی معیار دُرّ و گوهری صرّاف اولار بولر عاشقده رمز عشقیله عشقین عیارینی یارب یزیدین ایله گوزونده گونون قرا او زینبین سپید ایلیوب زلف تارینی بیر گونده چکمسِیدیله شمشیره بیر ائلی ایمدی بو زینبین ائل آلا دی کنارینی کلثوم ایدردی مجلس ماتم به پا منه داغلاردی داغ اودیله دل داغدارینی اکبر اذان ویرردی آلاردیم گوزل سسین دینین ئولن زمان ایشیدردیم شعارینی قاسم اوخوردی خوش سسیله جمعه سوره سین آسان ایدردی عمّه سینون احتضارینی تابوتیمی آلاردی ابوالفضل دوشینه اشکی یخاردی سیل صفت غم حصارینی تابوتیمون دوشردی بنی هاشم آردیجا هر سمتیدن سالیدی جنازم گذارینی یارب نوازی #حافظی صالح نصیب قیل گورسونله ئولمه میش او حسینین مزارینی ✍منکلام:مرحوم استاد حاج کریم حافظی تبریزی 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

شهادت حضرت زینب سلام الله علیها ای گیدن بلا چولونده غارته جلالی قارداش جان ویرور بلالی باجون هارداسان یارالی قارداش وار یادوندا سن اُلن گون عرصه گاه نینواده قان ایچنده جان ویرنده قتلگاه کربلاده آلماقا باشون دیز اوسته اول محل ابتلاده ایلدیم حسین اراده عرصۀ جدالی قارداش ال ایاق چالاندا گود قتلگهده سن برادر باشوی آلام دیز اوسته قویمادی سپاه کافر باغلیانمادیم گوزون من ای شفیعِ روزِ محشر زینبی او گوندن ایتدی محنتون خیالی قارداش وار کیمیم بو غربت ایچره باخبر بو نسگلیمدن آیری دوشموشم وطن دن هم قبیله هم ائلیمدن دوشموری بو صون نفسده بیر نفس آدون دیلمدن گوز یاشیم آخور گورنده چشمۀ زلالی قارداش آلتی گوشه قبرین اوسته چوخ چتین گلم دوباره گل ئولن زماندا باری باشیمی سن آل کناره من خجالتم ولیکن سن منی یتور مزاره آل هاشمه خبر ویر بو اسفلی حالی قارداش دوزدی هر غمه شریکوق اولماروق غم و محن سیز سن کفنسیز ئولدون اما قویما من ئولوم کفن سیز کیم ایدر کفن غریبه یوخ بیلن بو سرّی سن سیز حیف اولا که سنده مندن دوشموسن آرالی قارداش حالیمی آنام بتوله کاش بیر نفر یتورسون اوزگه بیر کسیم که یوخدی زینبه کفن یتورسون قبره قویماقا بلالی باجوی اوزین یتورسون یوخدی بیر نفر یانیندا دوغرانوب رجالی قارداش چخمیوب هله یادمنان ماجرای شام و کوفه سالدی کوفه نین جفاسی بدر صورتون خسوفه دوشدی شامیدن منیم ده عمریمون گونی کسوفه عمریمون گونی یاخوندور درک ائده زوالی قارداش گل عزیزه باجوون گور بیرجه حالِ احتضارین میلی وار وصاله الدن فرقتون آلوب قرارین گورمویوب دوباره گورمز گوزلری بو روزگارین من کیمی وفالی باجی سن کیمی وفالی قارداش #سعدی زمان علاقه باغلاسا اگر مشیّت اهل ماتمیله اولسا زینبون مزاری قسمت کربلایه قیل توجه ایله بو سوزی تلاوت ای گیدن بلالی چولونده غارته جلالی قارداش ✍منکلام:مرحوم استاد حاج سید رضا حسینی تبریزی متخلص به سعدی زمان ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

مدح حضرت زینب سلام الله علیها باجوام مریض فراقوام گل اوزون عیادته یا حسین اولا جانی زینبیوین فدا ایله بیر کرامته یا حسین باجی رسمیدی بو جهانیده اولا مبتلای محن اگر گله قارداشیم دیر ای خدا گوزی یاشلی یولّارا گوز تیکر نیه گلموسن بس عیادته منه لطفون آزدی اخا مگر باشیم اوسته گل کرمون گوروم یتیشوب نهایته یا حسین باجینون امیدیدی قارداشی باجینون پناهیدی قارداشی نه قدر سور سنی زینبون بو سوزه گواهیدی گوزیاشی دیموسن باجیمدی گیدوم گوروم بو قدر بلایه دوشوب باشی که وار احتیاجی بو صون نفس بیله بیر حمایه یا حسین نه قدر اوزاقه دوشم گینه چوخالار محبّتیم عاشقم اُلنه کیمی سنیلن منیم اولاجاقدی صحبتیم عاشقم سوزومه گواهدی گوزیاشیم بو دیار غربتیم عاشقم سنون عشقون اولدی سبب دوشم بو دیار غربته یا حسین بولوسن مریضیدی زینبون که چوخ احتیاجی دوایه وار نه دوا، اورکدن علاقه سی او دیار کرب و بلایه وار هامی دردمنده دوا اولان گوزی ایمدی خاک شِفایه وار اُپه، ایگلیه یوزونی قویا ایله پاک تربته یا حسین دیمورم شریک غم اولموشام سنه دشت کرب و بلاده من دیمورم که یاد ایلدیم سنی ال آچاندا ذکر و دعاده من دیمورم که قاره گیوب اخا سنه ساخلاموشدیم عزاده من دیمورم یولوندا دایانموشام چوخ آغور مشقّته یا حسین دیمورم که یثربی ترک ایدوب بیله اولموشام وطن آیریسی دیمورم که بلبلم اولموشام یانا یانه گل، چمن آیریسی دیمورم آنامدان ال اوزموشم بو گون اولموشام حسن آیریسی دیمورم که قلبیم الولانور یانورام او فرقته یا حسین دیمورم بو حالیده دیدیمه اُلورم بو گون گلنیم اولا دیمورم نجفدن آتام گله باشیم اوسته بوالحسنیم اولا دیورم که کاش بو کوینگون قویالار منیم کفنیم اولا من اُلم کفن اولا کوینگون بوکولم بو خلعته یا حسین بولوسن بو کوینگین اوسته چوخ باشیمی بلالره سالموشام دولانوب سویان دالیجا بونی یانا یانه آغلیوب آلموشام بوکولوب بِئلیم آغاروب ساچیم، بو امانت اوسته قوجالموشام نه امین صادق اولوب باجون بو گوزل امانته یا حسین نه غمیم نه غصّم اگر منه بو دیار غربت اولوب وطن باشیم اوسته گرچه عیادته بو گون اولمیوبدی گیدوب گلن گینه غربت ایچره داریخمارام منه مونس اولدی بو پیرهن باشیم اوسته گر اولاسان اوزون یترم سعادته یا حسین بولورم سویاندا بو کوینگی بدنون چوخ اینجیوب آغلارام قویارام که سینمون اوستونه گجه یا حسین دیوب آغلارام آلام عطر پاکیوی صبحلر اودی اگنیمه گیوب آغلارام بو یارالی سینمه دور دوا یری یوخدی منّته یا حسین یری اوخلارین سینن اوستی تک ساییه نه میندی نه یوز گلور باشیم اوسته بیر اولاسان منه گوره سن نه غم ویروب اوز گلور سنی مندن آیری سالان اوخون یری قلبیم اوستونه دوز گلور دگوری خیال ایدورم او اوخ دل پرحرارته یا حسین گوره سن قضا داخی بیر کسی بو زمانه ده منه بنزه در گوگروبدی قمچیلرین یری بدنیمی سوسنه بنزه در گیورم که کوینگون اگنیمه منی یا حسین سنه بنزه در باجون آرزوسیدی قلبیدن یته بو شباهته یا حسین باشیما ووروب دیرم آدون ساچیمی الیمله دراخلارام او قدر سیزیلدارام آغلارام یورولوب او حالیده یوخلارام یوخوما اگر گله سن اخا سنی حسرتیله قوجاقلارام اُپرم دوداقیوی اشکیمی توکرم او صورته یا حسین #حسنی بو شعریده وار یقین سنه دم ویروبدولر اوزلری نجه داش اورک اولا نرم ایدر اوخونان زماندا بو سوزلری دیوب هی سیزیلدیوب آغلیوب دولوب اشک حسرته گوزلری بودی آرزوی نهایتی گله بیر زیارته یا حسین بولوسن که درد نهانیمی سنه بیر فقط دیرم آقا شرر غمونده اورک یانار اودی خون دل ییرم آقا دولانوب محرّم آیی اولار قره کوینگی گییرم آقا قره کوینگیله یقیندور یترم سعادته یا حسین ✍منکلام:استاد حسین حسنی تبریزی ‍🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅

زبانحال حضرت زینب سلام الله علیها به امام حسین علیه السلام در حال احتضار گل یولون گوزلور بلالی زینبون قارداش حسین جان ویرور دلدن یارالی زینبون قارداش حسین من بلا یعقوبیم ای یوسف مُلک حجیز کوینگون سینمده آدون دلده اولّام اشکریز باشیم اوسته گل منی آخِر نفسده دوت عزیز لطفیوه قربان وفالی زینبون قارداش حسین آز قالور ترک ایلیم بو بی وفا دنیانی من جان دوداقدا گوزلورم بیر سن کیمی جانانی من باشیم اوسته گل گلن یولّاریوین قربانی من زلفی تک پوزقوندی حالی زینبون قارداش حسین آرتیرور سوزش فراقون زخم قلبیم قان ویرور قطره ی اشکیم نجوم آسمانی سان ویرور گل باجون غربتده قارداش حسرتیله جان ویرور واردی باشدا مین خیالی زینبون قارداش حسین آل هاشمدن منی دور ایتدی دور روزگار گوشه ی غربت قفس تک روحیمی تنده سخار قویما حسرت گوزلریم جان اوسته قالسون انتظار گوزلوری یول ماجرالی زینبون قارداش حسین گل اوزون آغلا گوزومدن سیل منیم گوزیاشیمی مهربانیم سن دیز اوسته آل بلالی باشیمی حسرتیم قالماز گورم جان اوسته گر قارداشیمی گل اُلور غم آشناسی زینبون قارداش حسین من علایق رختینی اوز قامتیمدن سویموشام آند اولا اوز عشقیمه عشقونده من جان قویموشام روزگاریمدن حیاتیمدن گونومدن دویموشام جان ویرور یورقون یارالی زینبون قارداش حسین عهدینه حاضردی عالی امتحان ویرسون باجون اهل عشقه عشق میزانین نشان ویرسون باجون سنده گل قرآن اوخی آسوده جان ویرسون باجون نطقیوه قربان عزالی زینبون قارداش حسین سینمی نار غمیله فرقتونده داغلادیم سیل اشکی عارضه خون دلیله باغلادیم جان ویرنده باشون اوستونده باش آچدیم آغلادیم اولدی جاری اشک آلی زینبون قارداش حسین حسرتیله ایمدی جان ویرسم اگر غربتده من نه اِئلیم وار نه قبیلم نه گلن وار نه گیدن لطف ایله گل اوز الونله غسل ویر ایله کفن مدفنه تاپشور بلالی زینبون قارداش حسین مقتلونده اونداکی آلموشدی آرامون عطش لعل سیرابون سارالموشدی سوسوزدان غنچه وش سندن اوتری قانلی جلّادیله ایتدیم کشمکش اولدی شمریله جدالی زینبون قارداش حسین گرچه درباروندا وار چوخ شاعر کامل عیار ایلیوب امّا اوزین عشقونده خوندل خاکسار دردی وار محتاجدور چوخ آغلار ایلر آه و زار خوشدی گر یتسه نوالی زینبون قارداش حسین ‍🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅

احوالات وفات حضرت زینب سلام الله علیها قسمت:1⃣ ایدنده زینب مظلومه ترک دنیانی یانندا اولمادی جان اوسته یار و اعوانی دوتوب کنارین اونون حال احتضارینده آلِیدیلر اورگیندن غم فراوانی گورِیدیلر نجه قارداش محبّتی دلده جهانی ترک ایدر اول رافت و وفا کانی آلوبدی سینه سینه پاره پاره بیر کوینگ او کوینگیکه آلور اوندان عطر جانانی دولی گوزیله باخور حسرتیله صاق و صولا عیان اولور که اونون واردی درد پنهانی مداد اشک ملالیله خامه ی مژگان یازاردی صفحه ی رخسارینه بو عنوانی حسین حسرتیله جان ویرور بلالی باجون وطندن ایلدن اوزاق دلده آه سوزانی ایدوبدی لوح دله حکّ نقش تصویرون باخور اورک گوزی، گوزدن آخور جگر قانی عیاندی قارداشی گوزلر باجی اُلن ساعت خصوص او باجی که قارداش اولا اونون جانی حسین اوزون بُلوسن گوزلریم قالوب یولدا گَل ای گَلن یولیوین بو بلالی قربانی او زینبم چوله دوشدوم یارالی سندن اوتور هامی مصیبته وقف ایلدیم قوری جانی سنون یولوندا بلالی باشیمی یاردیم من قزل قانا بویادیم طُرّه ی مُطرّانی سنون یولوندا منه چوخ وورولدی دل یاراسی ایله یارا که نه وار مرهمی نه درمانی سنون یولوندا منه خارجی دیدی اشرار سنون یولوندا منی دوگدی دشمن جانی سنون یولوندا آغاردی باشیم قرالدی قولوم سنون یولوندا قد سرویم اولدی چوگانی سنون یولوندا ایله داغلانوب منیم اورگیم که لاله اوندان آلوبدور او رنگ حَمرانی سنون یولوندا من اولدوم حسین خرابه نشین بهشت فرض ایلدیم کنج بیت الاحزانی همین خرابه ده بیر گوهر ایلدیم مدفون آدی رقیّه گلستان دین نواخوانی نجه رقیّه سارالموشدی بیر ساری گل تک خزانه گیتدی اونون عمرینون گلستانی سنون یولوندا حسین درده مبتلا اولدوم او درد سالدی ایاقدان بو خانه ویرانی یارالی منده سنون تک یارالی جان ویرورم بو عمر عاریه مون ختم اولوبدی دورانی بو صون نفسده گینه سالمارام آدون دلدن بو یرده صورته سالّام تمام معنانی بو کوینگون باسوب آغوشه عطریوی آلّام جهانه نشر ایدرم بیر محبّت اعلانی بو قانلی پیرهنون سینم اوسته جان ویرورم بُله هامی باجی قارداشین اولدی قربانی حسین بیرجه نولور ایله سن قدم رنجه ویرنده جان سالاسان یادیوه بو نالانی یانمدا یوخدی آنام اوغلی آل هاشمدن سالالّا یاده بو آق زلفی تک پریشانی جنازه می ایده لر حمل قبر ایاقینه عزیز دفن ایده لر یادگار زهرانی یادوندا وار که ویرنده یارالی جان یارالی ایدنده قانیویله لاله زار میدانی گَلوب او دم باجی قارداش محبّتی جوشه ایدوبدی جلب او محبّت دل شکیبانی دوزنمدیم باشون اوسته حاضر اولدوم من دلیمده ناله ی وای قارداشیم وای عنوانی گَل ایمدی منده سنون تک یارالی جان ویرورم بو گَلماقوندا یقین وار رضای ربّانی اله گَتور یارالی زینبین سنق اورگین شکسته دلده دی ا... یوخدی کتمانی باجون سویَر بُلوسن چوخ صدای قرآنون تلاوت ایله اوزون باشیم اوسته قرآنی حسین محبّتی دلده، آلوبدی سینه سینه او پاره پاره اولان کوینگی، چخوب جانی یوموب او گوزلری که قتلگاهی گورموشدی سرشکیله سولاموشدی او قانلی میدانی یوموب او گوزلری که گوردی چوخلی یاره ووران آلوب آرایه وورالّار شه شهیدانی یوموب او گوزلری که گوردی اُلدورولّه سوسوز کنار نهریده اشرار شاه عطشانی یوموب او گوزلری که گوردی شمر شوم و شریر حسینی ذبح ایدوری الده تیغ برّانی بو اُلدی چولقادی آفاقی ظلمت حسرت گَلونجه منتقم اولماز دوباره نورانی بُلنمورم که ویروب غسل کیم ایدوبدی کفن ترابه کیم تاپوشوردی او سرّ کبرانی ولیک واردی یری غسلینی ویرن یانسون گورن زماندا همان نیلفام اعضانی شماریه گَتیروب تازیانه یرلرینی ایده مجسّم اونون چکدوقی بلایانی ✍منکلام:مرحوم استاد حاج صادق ابوالحسنی متخلص به تائب تبریزی ‍🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅

احوالات وفات حضرت زینب سلام الله علیها قسمت:2⃣ و پایانی گَلوب دله باشی اوسته یانقلی دللریله بیر اوخشیه آنالار تک او مهد علیانی قویوب مزاره ایده ثبت قبرینون داشنا بو بیر خانمدی ایدوب غمله ترک دنیانی بو بیر عقیله دی شمس هدایتین باجیسی سپهر عصمتین عالمده ماه رخشانی طلوع ایلدی یثربده باتدی غربتده جهان عصمتی ایتدی غروبی ظلمانی بو بیر خانمدی که قارداشدان اوتری دوشدی چوله دلینده قارداش آدی گَزدی کوه و صحرانی مقام عشقیده دیوانه ی حسین اولدی گَزوب او عشقیله دیوانه وار هر یانی جفا الیله ایدوبلر اونی جلای وطن غریبه اُلدی مکان ایتدی تحت غبرانی بو بیر خانمدی یزیدین پوزوبدی سلطنتین ایدوبدی مفتضح عالمده آل سفیانی بو بیر خانمدی که گوزیاشلی آتشین نطقی دیریتدی حشره کیمی حکم دین و قرآنی بو بیر خانمدی نشان ویردی همّت عالی جهاندا نشر ایدوب اثبات حقّ اعلانی بو بیر خانمدی نه تک شامی ایلیوب تسخیر گَتوردی تحتینه بلکه تمام دنیانی بو بیر خانمدی که خدمتدن اولمادی خسته ایدوب حمایت دین تا واریدی امکانی بو بیر خانمدی ویروب دل اسارته امّا ایدوبدی قیددن آزاد اهل ایمانی گیده علیّ ولی شامه تاپمادی امکان که حقّدن ایده آگاه او اهل سامانی بو بیر خانمدی که ال تاپدی شهر شاماته آپاردی منبره زین العباد نالانی او منبریله تاپوب قدرت یزید شکست یزیده ایلدی وارونه تخت سلطانی بو بیر خانمدی یزیدی شهامتیله سخوب ضعیف ایلدی روحیّه دن او نادانی بو بیر خانمدی که شاماتیده ووروب بیرق بیان ایدوب شرف اهل بیت طاهانی بو بیر خانمدی بولود تک دولان زماندا گوزی ایدردی گوزیاشی شرمنده موج دریانی بو بیر خانمدی که حسرتله خویش ایلدن اوزاق ایدوبدی ترک بو دنیای محنت افزانی بو بیر خانمدی بوکوب بار غم قد سروین اوجاتدی پرچم اسلام و شرع غرّانی بو بیر خانمدی که قارداش جنازه سی اوسته ایله سیزیلدادی آغلاتدی قوم اعدانی دیدی آتام اولا قربان یارالی قارداشیما که ایکّی نهر آراسیندا آخوب سوسوز قانی منیم آتام اولا ایله مسافره قربان اونون قِییتماقینون یوخ دوباره امکانی آتام فدا اولا بیر زخمدار جان ویرنه که لاله زار ایلیوب قانی بو بیابانی آتام فدا اولا بیر شاهه گون ایوینده دوشوب قالوبدی قانلی قوم اوستونده جسم عریانی آتام فدا او حجازی شهه حصاره دوشوب اولوب بو دشتیده اهل عراق مهمانی آتام فدا اولا بیر تاجدار مذبوحه که پیکرینده اونون یوخ یاراسینون سانی آتام فدا اولا بیر پاره پاره گل بدنه دوتوب بلا چولونی عطر و روح و ریحانی آتام فدا اولا بیر زخمداره قتلگهی نشان ویرور گورنه گلستان رضوانی آتام فدا او غریبه که غصّه لی اُلدی گَتوردی نالیه جنّتده روح زهرانی آتام فدا اوناکی چاک چاک اعضاسی ویور نشان او گل برگ برگ خندانی آتام فدا او شهه خوردا بارماقیندا ویروب ویرنده اهرمنه خاتم سلیمانی آتام او یوسفه قربان که یوخدی پیرهنی دوباره قسمتی اولماز مدینه کنعانی اولوبدی منزل طوریده بو سوزه بانی بیر اکبر آدلی شه تشنه لب نواخوانی دوزوبدی رشته ی نظمه بو گوهری #تائب توکوب یازاندا یوزه اشک چشم گریانی خدا نصیب ایله بیر قبر زینب اوسته گیده همی بو جمع همی سوز یازان همی بانی ✍منکلام:مرحوم استاد حاج صادق ابوالحسنی متخلص به تائب تبریزی ‍🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅

زبانحال حضرت زینب سلام الله علیها در حال احتضار حسین وفالی باجون حال احتضاره دوشوب درون سینه ده یورقون نفس شماره دوشوب محبت عالمینی سیر ایدن وفالی مرید دیار غمده گوزوندن ایراق فشاره دوشوب طریق عشقی پیاده گزوب قدم به قدم حسین دیه دیه آردینجا کوهساره دوشوب اسیر حسنون اولوب مرغ روحیم ازلدن او گون بو گوزلریم اول نرکس خماره دوشوب قضا قدرله ویروب ال اله یازاندا یازی هامی بلا بو بلاکش دوشن مداره دوشوب او شام شوم که گوزده ایدوبدی گوندوزی شام دولاندی دوره او شهره یولوم دوباره دوشوب او گوهری که تراب ایچره ایلدیم مدفون منیله ایندی اونون قبری همجواره دوشوب ایله منور ایدوب تیره شامی خلق دیور سپهر مهر و وفادن یره ستاره دوشوب شمیم عشق و محبت مشام جانی دوتوب زبسکه بلبل غم دیده لاله زاره دوشوب او زینبی که یخوب کاخ ظلمی همتیله شکسته حالیله شام ایچره گیر و داره دوشوب نفس گیدور داخی گلمور گوزوم قالوب یولدا ئولوم توزی عرق مرگیله عذاره دوشوب نه بیر نفر سنی حالیمدن ایلوری حالی نه بیر کسین یولی عباس نامداره دوشوب دیه وفالی باجون غربت ائلده جان ویروری ئوزوب قبیله دن ال حال انزجاره دوشوب گوزومده گوزلروون عکسین ائتمیشم ترسیم گوزوم ئولنده ده گورسونله عکس یاره دوشوب سنه باخان گوزومی آز قالور اجل یومسون کمند مرگیله اووچی پی شکاره دوشوب ادامه دارد🔽🔽🔽 ✍منکلام:استاد حاج عبدالله اصلی ‍ ‍ 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

زبانحال حضرت زینب سلام الله علیها در حال احتضار بخش(پایانی) گوزومده گوزلریوین عکسین ایتمیشم ترسیم گوزوم اُلنده ده گورسونله عکس یاره‌ دوشوب ‌ جمالون عکسینه قورخوم بودور چکه هاله ایشقلی آی کیمی چون چشم اشکباره دوشوب سنه باخان گوزومی آز قالور اجل یومسون کمند مرگیله اوچی پیِ شکاره دوشوب کتاب عمرومی بیربیر ورق ورور گوگلوم گوزی سنیله گچن دور روزگاره دوشوب بلا چولونده گزور گلشن وفانی گورور ستمله پرپر اولوب قانلی جویباره دوشوب نه گل نه غنچه هامی سرولر صنوبرلر سنوبدی قول بوداغی شاخه دن کناره دوشوب دوشوبدی بیر یانا شرمنده شیر شرزهء عشق بیر آیری یرده گلوپاره شیرخواره دوشوب بویاندا عورت اوشاق وامحمّدا سسلنور اویاندا لشکر کین فکر تار و ماره دوشوب ویرور غروریله سعداوغلی لشکره فرمان غریبه فرصت او گون قوم کین شعاره دوشوب حریم عصمتی قصد ایلیوب سپاه شرور کبوتران حرم فکرت فراره دوشوب نه بیر پناه تاپور سایه سینده دالدالانا نه فکرینه او زمان آیری راه چاره دوشوب ریاض خلده ووران طعنه گل کیمی بالالار اسوبدی باد مخالف کمند خاره دوشوب قاچوبلا چوللره اللر باشندا دیز تیترور دالنجا هر بالانین بیر نچه سواره دوشوب بیری ستمله آلور بیر قیزین گلوبندین بیریسینون الینه قانلی گوشواره دوشوب بیریسی غارت ایدوب جبریله حریر و طلا بیرینه قسمت او غارتده گاهواره دوشوب وراندا هر بالیه تازیانه غارت ایدن منیمده جسمیمه مین یاره اوسته یاره دوشوب نلر اولوب دیمورم ساخلورام یانان دلده قلم یازاندا اورک دردیمی اشاره دوشوب قالان اساسیمیزه ظلم الیله ویردیلا اود منیم او اودّا یانان قلبیمه شراره دوشوب همان اودون اثری ایمدیده یانان دلده چکور زبانه شرر قلب داغداره دوشوب اماندی #اصلی دایان دفترون الولاندی نه اوت دی خامهء زرّین و زرنگاره دوشوب یقین بو آتش جانسوز آه زینبدی نه خامه شعله سی هر قلب بردباره دوشوب ✍منکلام:استاد حاج عبدالله اصلی 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» 🔴ایتا https://eitaa.com/hazratehzeynab 🔴تلگرام https://t.me/hazratehzeynab با ما همراه شوید✅

🍁بانوی صبر 🎤سخنرانی بسیار شنیدنی حجت الاسلام عالی 🔴کانال رسمی عاشقان حضرت زینب«س» https://eitaa.com/hazratehzeynab

🍁روضه حضرت زینب سلام الله علیها 🍁نشسته بود ناله میزد 🎤نوای دلنشین حاج مهدی سماواتی 💯پیشنهاد ویژه💯 🔴کانال رسمی عاشقان حضرت زینب«س» https://eitaa.com/hazratehzeynab

🍁نطق زینب تنگ سالدی کوفه نین خفاشینی 🍁قان دوندردی او ظالم زینبین گوز یاشینی 🎤نوای دلنشین حاج نادر جوادی 🍁بسیار دلنشین 🔴کانال رسمی عاشقان حضرت زینب«س» https://eitaa.com/hazratehzeynab

🎤 نوای دلنشین مرحوم استادحاج ماشاالله حسن زاده 🍁طفلان حضرت زینب سلام الله علیها 🍁بازار سال ۸۳ اردبیل محله نواب صفوی 🔴کانال رسمی عاشقان حضرت زینب«س» https://eitaa.com/hazratehzeynab

🍁ای که به خشکی لبات دریا توسل میکنه 🍁موندم چه جور این داغت دنیا تحمل میکنه 🎤نوای دلنشین حاج سید مهدی میرداماد 🍁بسیار دلنشین 🔴کانال رسمی عاشقان حضرت زینب«س» https://eitaa.com/hazratehzeynab

🎤نوای دلنشین حاج علیرضا اسفندیاری 🕌مسجد سرچشمه شب پنجم محرم ۹۵ 🍁طفلان حضرت زینب سلام الله علیها 🔴کانال رسمی عاشقان حضرت زینب«س» https://eitaa.com/hazratehzeynab

🎤نوای دلنشین حاج عبدالله داداشی 🍁طفلان حضرت زینب سلام الله علیها 🍁نوار کامل 🔴کانال رسمی عاشقان حضرت زینب«س» https://eitaa.com/hazratehzeynab

🎤سخرانی دلنشین حجت الاسلام غلامی 🕌هیئت مکتب العباس علیه السلام اردبیل 🍁مراسم سنتی و معنوی طشت گذاری ۱۴۰۰ 🔴کانال رسمی عاشقان حضرت زینب«س» https://eitaa.com/hazratehzeyna

🎤نوای دلنشین حاج امین مقدم اردبیلی 🍁مراسم سنتی ومعنوی طشت گذاری۱۴۰۰ 🕌مسجدمرکزی اردبیلیها 🍁قسمت اول 🔴کانال رسمی عاشقان حضرت زینب«س» https://eitaa.com/hazratehzeyna

🎤نوای دلنشین حاج امین مقدم اردبیلی 🍁مراسم سنتی ومعنوی طشت گذاری۱۴۰۰ 🕌مسجدمرکزی اردبیلیها 🍁قسمت دوم 🔴کانال رسمی عاشقان حضرت زینب«س» https://eitaa.com/hazratehzeyna

🎤نوای دلنشین حاج امین مقدم اردبیلی 🍁مراسم سنتی ومعنوی طشت گذاری۱۴۰۰ 🕌مسجدمرکزی اردبیلیها 🍁قسمت سوم 🍁روضه ناب و دلنشین 🔴کانال رسمی عاشقان حضرت زینب«س» https://eitaa.com/hazratehzeyna