گل ای تیره ایّامده سبزکار 🍃🌼🍃🌼🍃🌼🍃🌼🍃 در استبداد و استقبال از حضرت ولی عصر عجل الله تعالی . شاهی اردبیلی . گل ای تیره ایّامده سبزکار گل ای کولگه سینده فلک استوار گل ای پیکر عدلیده پود و تار گل ای مرتضی خو حسینی تبار گل ای یادواره، گل ای یادگار . . گل ای عرش اعلایه ناز ایلین گل ای امّتین نازین آز ایلین گل ای جدّینی سرفراز ایلین گل أی ذکر خیرین نماز ایلین گل ای گیزلین آیت گل ای آشکار . . گل ای عصر امامی زمان تشنه دور جمالوندہ کی نوره جان تشنه دور چیخوب روح ئوزیندن روان تشنه دور روان تشنه جان تشنه قان تشنه دور سالوب صبردن عالمی انتظار . . نه غم دیده لردن اوزاقسان آقا بوتون قلب لرده قوناقسان آقا سن، اولدوزدا یاتسا اویاقسان آقا ایشیقسان گونشدن قاباقسان آقا یوخیدی گونش سن اولان گونده وار . . سنه روحدن حق کسیب بیچدی جسم قوپار جلوه اول جسمدن قسم قسم او قسمین بیری سیندیرار مین طلسم گلنده آدون جان دییَر «سبِّح اسم» کلیم ایلییر کلمَه وَه افتخار . . . سنه جان دییور علم و ایمان آقا دونور باشوه عشق و عرفان آقا سنه فخر ائدیر روح قرآن آقا سنون پایتختوندی ایران آقا فراقون بو ملکی ائدیب بیقرار . . سنی خلوت شبده سسلر سکوت ظهورون یموتی ائدر لایموت تاپار غیب و معنا سنیلن ثبوت آدونلا مَلَک لر دوتوبلار قنوت دیورلر مناجاتیده یاریار . . بدایت سنوندور نهایت سنون رسالت سنوندور هدایت سنون امامت سنوندور ولایت سنون کرامت سنوندور کفایت سنون آدون آدمه بخش ائدیب اعتبار . . آلوبسان بیر اللهدن نور آقا سالوبسان ایکی عالمه شور آقا اولوب قلب اوچ رتبه ده حور آقا گزور دورد کنارونده مسرور آقا ائدیب بش اولوالعزمی عشقون خمار . . وئریلمیش مقام الهی سنه یتیشمیش گویون بارگاهی سنه گدادور یرین پادشاهی سنه دیور مدح قیرخ ایلدی «شاهی» سنه یاریم گوز نظر قیل اونا ای نگار . 🌼🍃🌼🍃🌼🍃🌼🍃🌼🍃