زبانحال حضرت موسی ابن جعفر (علیه السلام)   سِند الیندن گلمیشم جانه آنا یا فاطمه سنده گل بغداده زندانه آنا یا فاطمه   کاش اولیدی ای آنا ، آزاده لردن بیر نفر شعلهء آهیله قلبیم تک یانیدی مختصر بیر دییدی رحمسیز هارونه ای بیدادگر سیلی ورمازلا مسلمانه آنا یا فاطمه   من بو خلوتگاهیده جانانیله همرازیدیم محوِ وصلِ یاریدیم ، عشّاقدن ممتازیدیم حلقهء زنجیریمیله روز و شب دمسازیدیم شُکر ایدردیم حیّ سبحانه آنا یا فاطمه   قویمادی افسوس اولا دشمن منی اوز حالیمه یادِ یاریله یتَم قلبیمده کی آمالیمه حالیمی احساس ایدر هر کیم باخار احوالیمه گوز یاشیم آخدوقجا دامانه آنا یا فاطمه   بیر گجه مندن اولور زنداندا زجریله سحر قاتیلمده بیر گجه تختِ زر اوسته صبح ایدر وای او گوندن موج ایدر دریای قهرِ دادگر غرق اولار ظالم او طوفانه آنا یا فاطمه   ایتمدی رفتار دشمن ، منله بیر انسان کیمی قلبیمی یاندیردی زهری آتشِ سوزان کیمی قطره قطره قان دوداقیمده دوروب مرجان کیمی لاله تک باغریم دونوب قانه آنا یا فاطمه   نه عزیزیم وار آنا گورسون ملالِ فاشیمی قلبی یانسون حالیمه سیلسون منیم گوز یاشیمی نه قیزیم معصومه وار آلسون دیز اوسته باشیمی همدم اولسون بو پریشانه آنا یا فاطمه   واردی نه بیر اهلِ دل ، احوالیمی بیلسین منیم گوگلومی آلسین ملالیم بلکه اسگیلسین منیم نه گلور اوغلوم رضا ، گوز یاشیمی سیلسین منیم بیر سو سپسون سوزِ پنهانه آنا یا فاطمه   ایمدی جان ویرسم بو حالیله اگر زنداندا من نه ائلیم وار نه قبیلم ، نه گلن وار نه گیدن کیم مزاره تاپشورار کیم بس منه ایلر کفن؟ کیم گلر شامِ غریبانه آنا یا فاطمه   چون ایدوب مشمولِ رحمت ، خالقیم اوز بنده سین گون کیمی گورّم ایشیق تاریخمین آینده سین مرگ باغلار هر نجه محکوم اولا پرونده سین آشنا یا اولسا بیگانه آنا یا فاطمه   سِندی گورسم ، رنگِ رخساریم دیمه قاچماز منیم طایرِ روحیم بو خاکی دامدن اوچماز منیم دشمنِ بی عاطفه زنجیریمی آچماز منیم جان ویرم آسوده جانانه آنا یا فاطمه   من آنا باشه یتوردوم باشداکی تقدیریمی اهلِ دل باخسا وجودیمدن گورر تصویریمی قاتلیم ئولسمده آچماز جسمدن زنجیریمی ظلم ایدر بی روح انسانه آنا یا فاطمه   جان ویرنده دفنه راجع بیر وصیّت ایلرم بو مُقیّد جسمیله محشرده شرکت ایلرم منتقم آللهه دشمندن شکایت ایلرم انتظارم من او دیوانه آنا یا فاطمه   نوکرون (خوندل) بو درگاهه قویوب چوخدان یوزون وار سنه آرتوق ارادت اوندا ، آگهسن اوزون قویما قالسین ننگدور بیگانه اللرده گوزون تا قورتارسین عمری شاهانه آنا یا فاطمه.   مرحوم حاج حیدر خوندل