میلادیه حضرت علی اکبر (ع)
.
نوید آسال اردبیلی
.
آچ گوزون ناز ایلمه روحیمه ریحان اوغلوم
آلماقا نازووی قیمتدی فقط جان اوغلوم
یوسفین شهرتی گر مصری دوتوبدور اما
ایلیر بیر نگهون یوسفی حیران اوغلوم
.
گجه گورسه یوزووی ماه باتار خجلتدن
سیره چیخماز داخی اول بدر درخشان اوغلوم
گلمگون عالمه عرشه یتیروب عزتیمی
منه عزت یارادان اوغلوما قربان اوغلوم
.
بشیگوندور بو جهاندا گوزلیم پاتختون
بو جهان ایچره منم کاخووه دربان اوغلوم
قلبیمی غملر آلوب بیر نگهوندور چارم
بیر نگاهونله ایله دردیمه درمان اوغلوم
.
آغلاما باخماقا گوز یاشووه یوخ منده توان
گول یوزونده دوزولوب گوهر و مرجان اوغلوم
کیم گوروب صورتووی سسلدی احمددی گلن
سنده رخسار نبی اولدی نمایان اوغلوم
.
امپراطور جهان گورسه بو صورتده سنی
گوتورر فوری یقین تاجینی باشدان اوغلوم
بو تاجی قویماقا لایقدی دییر تک اکبر
نابه جادور من اولام عالمه سلطان اوغلوم
.
رخت شاهانی سویار جامه ی خدمت گیینر
سنه نوکر اولار اول حاکم دوران اوغلوم
کیم حسینوون اولا اولادی ولی حرمتی وار
اونا تعظیم ایلیر عالم امکان اوغلوم
.
گوره سن گوزلریم اوغلوم گوره جک طوی گونووی
طویووی گورسم اگر ایتمرم افغان اوغلوم
یثرب اهلین هاموسین جشنووه دعوت ایدرم
اولالار تاکی اوگون جشنوه مهمان اوغلوم
.
اوز الیملن یاخارام اللرووه طوی خناسی
سالاجاق بوینووا گول سرور خوبان اوغلوم
ای نویدا یمه غم یازدیغون اشعاره ویرر
روز محشرده سنه خلعت شایان اوغلوم