نوحه حضرت رقیه سلام الله علیها آمدن دختر یزید به خرابه شام کیمدی رقیه گل بی خار عشق زینب کبرایه اولوب یار عشق سنی آزیدی او ملک منظرون ائتدی قیامت نجه دلدار عشق خیردا اوشاقیدی ولی عالمه وئردی وفا درسی وفادار عشق فاطمه بنزر قیزا صدمرحبا نیلدی گور عارف هشیار عشق زینب کبراییله عهد ایلیوب اولدی همان لحظه علمدار عشق سویلدی تا ئولمه میشم عمه جان من اولورام عاشق بیدار عشق حق سوزونی سویلدی مستکبره قورخمادی هئچ یار و مددکار عشق واضح و بی پرده دیدی سوزلرین یار وفادار و فداکار عشق سویلدی من بت شکنم ای یزید باشلادی محکم دئدی اشعار عشق قورخمادی خیردا بالا جلادیدن جنگه چیخوب خیرداجا سردار عشق قصر یزید ایچره سالوب ولوله منطق برنده ی گفتار عشق زیر و زبر ائتدی اودم مجلسی باشلادی گویا ائده پیکار عشق وجده گلوبدور اسرا هامیسی تاپدی طراوت گل گلزار عشق عمه سی احسن دیدی ایثارینه ئوپدی یوزوندن او پرستار عشق گوشه ی ویرانیه تا گلدیلر واضح اولوب جلوه ی اسرار عشق دعوت ائدوب صبره اونی عمه سی غم یمه ای زینبه غمخوار عشق اود توخانوبدور پر پروانیه گلدی یزیدین قیزی ویرانیه گلدی شماتت اوخونی ویرماقا آل علی قلبینی یاندیرماقا سیم زرین وئردی نشان قیزلارا باخدی غروریله او اولدوزلارا قلب اسیرانی کباب ایلدی اول گل زهرایه خطاب ایلدی واردی بابام سایه سالوب باشیمه چپ باخا بیلمز بیری قارداشیمه لیک سنون یوخدی بابون آغلوسان اکبریوه دائم ئورک داغلوسان آغلیسوز قولسوز علمداروزه قانه باتان گلشن و گلزاروزه دوردی رقیه اونا وئرسون جواب هرزه دانیشما دئدی خانه خراب ایتدی بابون کرب و بلاده جفا صبریمی تالان ائلمه بی حیا سیم و زری نیلیورم گوهرم وارث پیغمبره من دخترم تازه لباس اگنیمه من گیمرم سیم و زره معجریمی وئرمرم اکبر شهزاده کی قانه باتوب دینیمیز اوستونده مرامه چاتوب دوزدو شهید اولدی گل یاسیمیز کامه چاتوب اول شرف الناسیمیز جوشه گلوب منبع احساسیمیز ماردی ئولدوردی او عباسیمیز عالمه سلطاندی بابام ای دنی ناطق قراندی بابام ای دنی شاه شهیداندی بابام ای دنی آللها قرباندی بابام ای دنی عفت و عصمت منه ارثیه دی رگده‌کی غیرت منه ارثیه دی سن نه بیلورسن که شهادت ندی سن نه بیلورسن که شهامت ندی آغزیوی یوم من نوه ی حیدرم عالم امکانه اولان زیورم قاره علملر اسه جک حشره جک ریشه ی ظلمی کسه جک حشره جک عرشه چیخوب عزتیمیز جاهیمیز قصروزی ویران ائده جک آهیمیز (طیبی) گل عرض ارادت ائله درگه شاهنشهه عادت ائله نازلی رقیه سنه امداد ائدر نوکر درگاهینی دلشاد ائدر کربلایی حسن طیبان