▪️▪️▪️▪️▪️ ▪️▪️▪️▪️ ▪️▪️▪️ ▪️▪️ ▪️ #کوچ_از_قتلگاه عجبدی، ظلم ایلیوب خصم دون دوباره عجب اولوبدی جسمیوی مقتلده پاره پاره عجب خدا بولور نه قَدرِ اوخ دَگوبدی پیکریوه یارالارون سایورام گَلموری شماره عجب باخاندا جسمیوه جانا کباب اولور اورکیم گینه بو حالیله من ایلورَم نظاره عجب گوله گوله سَنی من سالمیشام یولا هر چند ولی غمون سالوری قلبیمه شراره عجب قوری یر اوسته اولوب پیکرون پراکنده کانَهُ سَپیلوب لاله کوهساره عجب ویروبدی گلشن دینه غریبه پیرایه چَکوبدی جذبه سی ارواحی لاله زاره عجب مشام جانه یتور عطر حضرت خاتم بو عطر طعنه ویرار عطر مشکباره عجب نه عالی عطریله مملو اولوبدی دشت بلا خزان دونوب ایله بیر فصل نوبهاره عجب باجیوی جور و جفا آغلادور بیله قان یاش گیدر گوزومده آخان گوز یاشیم مزاره عجب نه ائدوم گِِچن گیجه بو یرده حشر اولوب بر پا یولومدا دوشمدی اول دمده بو گذاره عجب کَسنده اللریوی اول شقی جفایله گَلوبدی جن و ملک یکسر آه و زاره عجب بو ظلمی ایلینین آللَری گوروم قورسون کسوبدی بارماقی تندن، سالوب کناره عجب دوشوبدی لرزیه نهر اوسته پیکر سقا دئیوب قلم قولی سقای نامداره، عجب بولوبدولر او اوزون قولاری دگور تنده اودور جسارت اولوب غملی شهریاره عجب جهان عاریه نین اعتبارینه لعنت گدادی معتبری بیله اعتباره عجب گهی فرحلنیرم دلده عشقیوه یارالی گهی غمون سالور اود قلب بی قراره عجب عجب زمانه دی هِی یوز ویرور منه مُحنت عجیبه چرخیدی کردار کجمداره عجب عتیق عجب دَگور هر چامه که اولور تکرار عجیب عجبدی، که تکرار اولا دوباره، عجب التماس دعااا🙏 ▪️ ▪️▪️ ▪️▪️▪️ ▪️▪️▪️▪️ ▪️▪️▪️▪️▪️