زبانحال جناب حر (ره) حر گمراهم گناهیمدن خجالت گلمیشم عین ذلتده تاپوب راه سعادت گلمیشم خواب غفتلدن بو گون چشم دلیم بیدار اولوب مست صهبای تغافل، دفعتاً هوشیار اولوب شایقم عقبایه بو دنیا گوزومده خوار اولوب ایتمشم ترک جلال و جاه مکنت گلمیشم من او غواصم که تاپدیم گوهر یکدانه می ترک قیلدیم جان و ملک و شوکت شاهانه می حیف اولا اما اگوب بار خجالت شانه می اولموشام مستغرق دریای خجلت گلمیشم واریدی میخانه عشقونده بانگ نوش نوش بانگ نوشانوش سالدی جانیمه جوش و خروش نه بیله بیر بزم اولار، نه سن کیمی بیر می فروش ایلیوب دور بوی می، بو بزمه دعوت، گلمیشم می نه می؟ بیر جرعه سینده نشئه مین جام وار ذوق مستی وار، صفا وار، جذبه وار، الهام وار سرخوشان بزم عشقه، یاردن پیغام وار امن و الفت بزمی دور، بو بزم وحدت گلمیشم منده گلدیم دست پیر عشقدن بیر جام آلام لکه ننگی یووام اوز دامنیمدن، نام آلام برق شمشیریله قلب خصمدن آرام آلام قویمیام دشمن گوزینده، خواب راحت گلمیشم ای ولایت ملکنه شاهنشاه عالی تبار شکر اولا اللهه ختم اولوب انجام کار من اوزوم گر چه امیر لشکرم، سرباز وار خدمتونده ایتماقا هر گونه خدمت گلمیشم سن کلیم عشق سن، کرب و بلا بیر طور حق نشر اولار قانیله بوردان عالمه منشور حق مه جمالوندا عیاندی انجلای نور حق روحیمی مجذوب ایدوب، نور حقیقت گلمیشم من سنی موجه گلن دریای رحمت گورموشم اللرونده بارش ابر کرامت گورموشم مه جبینونده شها، نور ولایت گورموشم اولموشام مست می ناب ولایت گلمیشم بیر نگاهندور ایدن توپراقی مطلق کیمیا خاک کویوندور هامی درد اهلینه رمز شفا سن طبیب عشق سن، من دردمند بینوا ایتماقا اوز دردیمه بوردا طبابت، گلمیشم باطلی ترک ایتمیشم تا حقه پشتیبان اولام مکتب عشقونده گلدیم، طفل ابجد خوان اولام ایسترم منده فدای مکتب قرآن اولام وار سویدای دلیمده بیله نیت گلمیشم لطف ایله قورتار غم و اندوه خجلتدن منی اصغره فرض ایله بیر نوکر بو ساعتدن منی بهره مند ایله فیوضات شهاتدن منی قلبیمی لبریز ایدوب شوق شهادت گلمیشم ساحل امیدسن، من غرق دریای گناه بیر پشیمانم سرشک دیده بو امره گواه باشیم اوسته سایه سال، ای سایه لطف الاه محضروندن وار تقاضای عنایت گلمیشم بیر گناهیمدن دوشوبدور اهل عالم حیرته سد راه ایتدیم بو چولده، اهل بیت عصمته نازپرور قیزلارون سالدیم هراس و وحشته جسمیمی ایمدی دوتوب آثار وحشت گلمیشم قویما تیر غم دل آشفته می چاک ایلسون اذن ویر حره که قانین زینت خاک ایلسون بلکه قان یوزدن غبار خجلتی پاک ایلسون خجلتیمده قالمیوب حد نهایت گلمیشم ایلمز راضی داخی بوندان صورا منصب منی یاندیرار اما شرار درده بیر مطلب منی نیلرم عفو ایتمسه بیرده خانم زینب منی اود سالوبدور جانیمه سوز ندامت گلمیشم دشمنوزده ایله کیم ذاتاً رذالت ارثدور سیزده جدوزدن ولی نسلا اصالت ارثدور بالاخص زینبده زهرادن نجابت ارثدور تا باجون ایتسون منی، مرهون منت گلمیشم لکه ننگی یوانماز دامنیمدن رود نیل چاره سیز قالدیم گلوب درگاهوه دوشدوم دخیل سیز قبول ایتسوز منی، رد ایلمز رب جلیل من بو درگاهه به امید شفاعت گلمیشم قویما روحیم جسمیمه بیر وصله ناجور اولا کام دل شهد شهادتدن شها مهجور اولا حر ایستور حشرده، عباسیله محشور اولا قویما سینمده قالا بو داغ حسرت گلمیشم من غریق بحر عصیان، سن کرم دریاسی سن رهروان کوی عشقین سرور و مولاسی سن دهرده هر بی پناهین ملجاء و ماواسی سن بسلیوب دلده سنه چوخلی ارادت گلمیشم تا قبول ایتدون منی، ای شمع حق پروانه سی باده شوقیله دولدی آرزو پیمانه سی بذل جاندور مقدمونده لطفوین شکرانه سی ایتماقا جانیله جبران خسارت گلمیشم قومادون حری قاپوندان، ای شه گردون حشم دست خالی سائلی رد ایلمز اهل کرم منده (مجنون) گنه کارم، سیزه خیل خدم دلده وار بیر حاجتیم، ارباب حاجت، گلمیشم شاعر : سید محسن رجایی (مجنون) لینگ کانال در ایتا 👇👇👇👇 ﷽🍁 @Ghateelolabaraat ✨اَللّهُمَّ عَجِّل لِوَلیِّکَ الفَرَج✨💫