خطاب حضرت عباس به لشکر کوفه ای سپاه شام و کوفه بو حسینون یاریم من                         یادگار مرتضایم بو شهون سرداریم من غم گونی غمخواریم من باخمیون بیکسدی بو شه یوخدی بیر یار و معینی                       جان بکف قربانیم من قویمارام تک شاه دینی اذن ویرسه محو یکسر ایلرم بو قوم کینی                                      بو شهون جان عدویه تیغ آتشباریم من شیر میدان شجاعت قدرت الله اوغلیام من                             هم شه بی یاره نوکر هم شهنشه اوغلیام من آفتاب چرخ دینون صورتی مه اوغلیام من                                    حیدر کرار آتامدور پور مه رخساریم من من علمدار رشید خسرو گردون مدارم                                        هر فنون جنگه دارا شیرزاده نامدارم من بو شاه کم سپاهون مقدمونده جان سپارم                       قویمارام باتسون ملاله غم گونی غمخواریم من هر یوزون دولدورسا لشگر ذرَه  جه باک ایتمرم من                     اولماسام داخل فراته آرزومه یتمرم من آلماسام سو سیزدن اوللم خیمه گاهه گئتمرم من                       چون وظیفمدور بو امرون ختمنون ناچاریم من حکم دعوا اولسا صادر پادشاه کربلادن                          قویمارام بو  چولده زنده بیر نفر اهل جفادن مقصدیم دور سو آپارماخ یوخدی باکیم اشقیادن                         اهل بیت شاهه سقا ، همده خدمتکاریم من ویرمیشم سو وعده سین چون دختران ماه رویه                      منتظردور تشنه قیزلار خیمه ده بیر شربه سویه اولمگیم خوشدور اگر من یتمییم بو آرزویه                           منصب سقَالیقون چون صاحب اظهاریم  من چونکه سقایم بو چولده ایلرم بو اهتمامی                          سو یولون گوزلور اوشاخلار آغلار اللرده سوجامی من گرک سیراب ایدم بو اهل بیت تشنه کامی                    گللری سولموش حسینون ساقی گلزاریم من بو علم که پرچم آچمیش سو کنارینده جماعت                 یعنی عباسوندی بو سو اختیارینده جماعت بو سویون وار چوخ لب عطشان انتظارنده جماعت         اهل بیت تشنه کامون دیده دن خونباریم من ایشدیلر جام شهادت جمله انصاری حسینون                عالم ظاهرده بیر من قالمشام یاری حسینون باطنا جن و ملکدن وار فداکاری حسینون                    پادشاه انس و جنون خادم درباریم من لشگر شاه حجازه من بو صحراده امیرم                   فارِس میدان قدرت جنگجوی بی نظیرم هم علمدار حسینم هم معین و هم مشیرم                    هم وزیری هم امیری هم سپهسالاریم من اولدروب هشتاد نامی پهلوانی قاشدی لشگر                   نعره ی الله اکبر چکدی دیلدن  زاد حیدر حمله ور اولدی سپاهه الده تیغ تیز او سرور                 من ابوالفظلم بو شاهون تشنه فرمانداریم من مشگینی دولدوردی سقا چخدی دریادن لب عطشان           دوندروب یوز خیمه گاهه مرکب اوستونده شتابان باخبر اولدی بوحاله سعدون اوغلی ویردی فرمان           یاغدیرون عباسه تیری آمر پیکاریم من اوخ آتانلار آتدی باخموب بو مروتدن اوزاخدی          گلدی بیر اوخ دگدی مشکه مشک اولوب پاره سو آخدی اشک حسرت آخدی سو تک ماه رخساره گوزوندن     سسلدی بو اوخ دیور بیل ایمدی مرگ آثاریم من «ذاکر» #ای_سپاه_شام_و_کوفه #عباسیه #ذاکر https://eitaa.com/Hazrate_Abalfazll