نوحه ی در آهنگ حماسی/رجز/قمربنی هاشم حضرت ابوالفضل(ع)
_
یا ابوالفضل عشقیوه دنیاده من دل باغلادیم
سسلدیم داده سنی آدون گلنده آغلادیم
ای علمدار حسین
یار و غمخوار حسین
ـــــــــــــــــــ
عبد صالحسن آقا دهره عیاندی شهرتون
آند اولا آیات نوره سینمیوب شخصیتون
عالمی حیران قویوب مین دورت یوز ایلدی غیرتون
ای علمدار حسین
یار و غمخوار حسین
ـــــــــــــــــــ
کربلا دشتینده سن استاد رزم و جنگیسن
معنی و مفهوم غیرت مرد با فرهنگیسن
سن حسین بن علینون با ادب سرهنگیسن
ای علمدار حسین
یار و غمخوار حسین
ـــــــــــــــــــ
ای بنی هاشم آیی ای تکیه گاه اهلبیت
ای بلالی دشتیده پشت و پناه اهلبیت
ای گوزل آدی همیشه عزّوجاه اهلبیت
ای علمدار حسین
یار و غمخوار حسین
ـــــــــــــــــ
ای علینون قهرمان اوغلی حسین سرلشگری
مادریندی فاطمه نسوان عالم سروری
ساقی کوثر آتان آدی دیلیمون ازبری
ای علمدار حسین
یار و غمخوار حسین
ــــــــــــــــ
مرحبا مولا حسینون باادب قارداشینه
هم ئوزون قوللارینه هم اول هلالی قاشینه
باغلیوب سربند یا زهرا ابوالفضل باشینه
ای علمدار حسین
یار و غمخوار حسین
ـــــــــــــــــــ
مشت محکم سینه ی اهریمنه ویردون آقا
شمر امان نامه گتوردی سن ولی جیردون آقا
نهرین اوسته پرچم حریتی ویردون آقا
ای علمدار حسین
یار و غمخوار حسین
ــــــــــــــــــ
سن یل ام البنین سن حامی قرآنیسن
تشنه سردار حسین سن ساقی طفلانیسن
سن حسینون کربلاده تابع فرمانیسن
ای علمدار حسین
یار و غمخوار حسین
ـــــــــــــــــ
حضرت عباس آقا ای ساقی والانسب
حق سنه اعطا ایدوب دنیاده اون یدی لقب
حیدر ثانی سن ای تند یس ایثارو ادب
ای علمدار حسین
یار و غمخوار حسین
ــــــــــــــــ
افتخار ایلر ملکلر غیرتون قاموسینه
مرحبا سویلر فلکلر عشقون اقیانوسینه
مرتضی احسن دییردی قوت بازوسینه
ای علمدار حسین
یار و غمخوار حسین
ـــــــــــــــ
من همیشه اهل سوزوغصه و دردم آقا
هرکجا باشم اگر دور تو میگردم آقا
ساتسام عشقون عالمه واللهی نامردم آقا
ای علمدار حسین
یار و غمخوار حسین
(بهلول حبیبی زنجانی)
#عباسیه