‍ حضرت علی اصغر (ع) زبانحال حضرت رباب (س) او اوخ آتان کی سنی قانیله خضاب ایلیوب اوخون آتاندا ، منیم قلبیمی کباب ایلیوب دگنده اوخ ، ئورگیم بولدی خیمه ده ، گوردوم قیزشدی قلبیمی اود دوتدی التهاب ایلیوب او اوخ یخوب ایویمی ، روزگاریمی چووروب سنی اگر چه فرات اوسته کامیاب ایلیوب دونن گون اورتا چاقندان ایتیرمیشم ئوزومی کرخدروبدی منی فکریمی خراب ایلیوب او اوخ نجه اوخوموش بولمورم ، دیولّه ولی همان اوخون تایی سقّانی دلکباب ایلیوب سحر اولونجا سالوب چیخموشام دونوب دیمیشم نه خاطره سنه ده اوچ پر انتخاب ایلیوب یتیشمیشم بو یئره فکریمی ایدوب آزاد مقام عشقده چون قهرمان حساب ایلیوب گه آغلورام سنه گاهی باخوب فرحلنیرم یوزونده نور خدا گور نه باز تاب ایلیوب او قان دولان گوزیوه گوزلریم اولا قربان دوباره قانلی باشون نی ده انقلاب ایلیوب صبا آلور گوزل عطرون مشامیمه یترور خمار و نشئه ، منی عطر و بوی ناب ایلیوب مشامیمه یتیشن عطریوه اوزوم قربان او اوچ پر اوخ گولومی ایله بیر گلاب ایلیوب اوجاتموسان باشیمی عرشه سن ایوین آباد منی شهید آناسی هر گورن خطاب ایلیوب ولی ئورکده منیم نچّه نیسگیلیم واردور کچن گیجه او کی وار روحیمه عذاب ایلیوب بیری بودور کی سو اوستونده باغلادوم اَلیوی آنان خیال ایلیردی اوغول ثواب ایلیوب ولی دیولّه او اوخ سانجلاندا حنجریوه الی کی قونداقا باغلیدی پیچ و تاب ایلیوب اودم صودوم یوخودی ناعلاج قالمیشدوم دیمه آنام اَلیمی بسته طناب ایلیوب گلوبدی سینمه سوت ایندی منّتون چکیرم سالوبدی جانیمه اود ، قلبیمی کباب ایلیوب وریدیلر او باشی سینم اوسته ساخلاردوم هزار حیف اولا کی دشمنیم جواب ایلیوب نئیون یوخوندی سنون ((ساده )) دار فانی ده بو بس کی اصغر آدی دیده وی پُر آب ایلیوب ** داود طهمورثی تبریزی (ساده) برچسب‌ها: داودطهمورثی تبریزی عتیق