‍ 🌹🌹🌹🌹🌹 حسینه یئرلر آغلار گؤیلر آغلار بتول و مرتضی پیغمبر آغلار اولوب ماتم‌سرا عالم حسینه محرّمدور بو عالم یکسر آغلار قالوبدور ماسوا صبرینده حیران یاخار قان چشم چرخ اخگر آغلار غبار غم دوتوب کون و مکانی باتوب یاسه هامی خشگ و تر آغلار دوتوب افلاکیان ماتم حسینه امین وحیِ پیک ِداور آغلار فراتی باغلیوبدی آل سفیان بو غمده سلسبیل و کوثر آغلار سوسوزلار ناله‌سی دوتموش فضانی عطشدن اهلبیت حیدر آغلار دئیر لیلا خِیَمده وای اوغول وای آلار سس رزمگه‌ده اکبر آغلار فرات اوسته دوشوب بیر سرو قامت باشی اوسته شه بی‌یاور آغلار علمدارون قولی تندن دوشنده علم آغلار، شه آغلار، لشکر آغلار تاپولمور سس وئرن بی‌کس امامه بئشیکده چون سوسوزدور، اصغر آغلار ائدر تأثیر آهی کائناته امام احوالینه ملکلر آغلار باخار قیزلار یانار احوال شاهه نوالردن هامی بحر و بر آغلار داغیلمش چوللره آل پیمبر ابوالفضلی هرایه سسلر آغلار بناتِ فاطمه یا حجت الله قالوب دشمن الینده مضطر آغلار اولوبدو «خازن»نین روز ازلدن حسین آدی دیلنده ازبر آغلار #استاد_خازن