‍ ‍ ‍ #زبانحال حضرت امیرالمومنین (ع) در کنار مزارحضرت زهرا (ع) سبک : ای حرمینه ناز ائدن ... عطری گلور محرمون ... واردی باشیمدا یا حسین ... فاطمه قبرون اوسته من گلمیشم آغلیام گئدم ائوده یاتوب حسین حسن گلمیشم آغلیام گئدم گون باتوری قرا سالور باشه حجاز داغلاری آغلوری دردیمه منیم حسرتیلن بولاقلاری یل اسوری چالور عجب غملی ترانه باغلاری غملیدی گلشن و چمن گلمیشم آغلیام گئدم ائوده گئدر گجه هامی مرد و زن استراحته گون باتوری علی باتور بحر غم و ملامته بوش گوره بیلمورم یرون نایل اولا زیارته قبروون اوسته گلمیشم آغلیام گئدم ریشۀ صبر حیدری سیل فراقتون یولور یاده سالاندا محنتون گوزلریم اشگیلن دولور خردا بالالار آغلاشور گول کیمی زینبون صولور غربت اولوب منه وطن گلمیشم آغلیام گئدم رحلت ایدن زمان آتان باشیوه قاره باغلادون من بله بیلدوم هجرت احمده سینه داغلادون بیلمزیدوم یارالیسان سن گجه گوندوز آغلادون ایندی او سرّ اولوب عَلَن گلمیشم آغلیام گئدم خیمه وروبدی غصّه و غم دل داغداریمه یاده سالاندا یاره وی اشگیم آخور عذاریمه حسرتیلن دوشور گوزوم قبضۀ ذوالفقاریمه چکمم اونی غلافدن گلمیشم آغلیام گئدم واردی یادیمدا بیر گونی سن منه ایلدون خطاب چِک گیله ذوالفقاریوی حقّوی آل ابوتراب ایندی علینون ایلوری قلبین او منظره کباب یوخدی علینی دیندیرن گلمیشم آغلیام گئدم آلدیلار حقّیمی منیم مجلس شور قوردولار بوینونا شال سالدیلار شیر خدانی یوردولار سن کمک ایلدون سنه ظلمیله قمچی وردولار توپراقا دوشدون اوندا سن گلمیشم آغلیام گئدم تحت نظرده دور منیم منزل وحی مُنزَلیم سن ساقیدون بیر آز گینه ائوده واریدی گئت گلیم گئتدون الیمدن ایندی سن باغلی قالوب قاپیم الیم یوخدی بیزه گلوب گئدن گلمیشم آغلیام گئدم گرد غمون نشست ائدوب قلبیمه چوخ چتین سیلم جان یتیشوب دوداقیمه فاطمه راضیم ئولم گلمیشم ایندی قبریوون اوسته بیر آزجا دینجلم ئولمور علی ندن؟ ندن گلمیشم آغلیام گئدم سن ائویمه گلین گلن وقته یوخیدی چون آنان غصه لَنَردون هر زمان گوز یاشین ایلدون روان زینب عروس اولان زمان بخت ائوینه گیدن زمان فاطمه نیلوم اوندا من گلمیشم آغلیام گئدم آیریلیقون سالوبدی اود بو دل پر شراریمه یالوارورام یوخی گَله دیدۀ اشکباریمه محسنی آل قوجاقیوه گَل یوخودا کناریمه روح تاپا بو خسته تَن گلمیشم آغلیام گئدم محنت فاطمه سنی ایلدی «عینی فرد» حزین قلبووی یاندیرار چخار سینه دن آه آتشین شعر یازاندا صدقیلن یاز ائله پاک نیّتین گور نه گوزلدی سر سخن گلمیشم آغلیام گئدم 📣 حاج غلامرضا عینی فرد زنجانی