🌿🌸🍃🌾
🍃🌺🍂
🌸🌾
🍃
مدح ومیلاد
حضرت امام رضا علیه السلام
اصغرفرشچی( عدلی تبربزی)
ای حُجّت حق ميرعرب شاه خراسان
ای باب رجا باب کرم ایت بيزه احسان
ای كعبۀ ـ اهل وفاـ جانم رضا جانم رضا
ای ملجاءـ شاه وگداـ جانم رضاجانم رضا
ای خطّۀ ايرانه ويرن شأن و شرافت
زوّارون اولا كيمسه سنی ايتسه زيارت
احسان ايده سن سائلوه ايستسه حاجت
محشرگونی سنلن اولاجاق خلقه شفاعت
مولای جهان سرور دين سروگلستان
ای باب رجا باب کرم ایت بيزه احسان
جانلارسنه قربان كه قاپون باب هدادی
اسموندی رضا جملۀ اسماء خدادی
درگاهيوه اولموش خدمه شاه وگدادی
زايركه گلر طوسه دئیركرب و بلادی
ای ضامن آهو و غريب حافظ قرآن
ای باب رجا باب کرم ایت بيزه احسان
زوّارگلر قبريوه سرّين دئير آغلار
اظهار ايلير دردينب هر درده گرفتار
مشتاق اولی بير باخماقوا ياور ودلدار
قالماز اونا گرلطفون اولا درديدن آثار
ای عالميانی ايدن اوز عشقينه حيران
ای باب رجا باب کرم ایت بيزه احسان
حسرت چكرم بيرده مزارون ايليم بوس
قبروندی بو قلبيمده منيم گوشۀ فردوس
اميديمی حرمانه دونوب ايلمه مأيوس
احسان ايله قربان سنه ای پادشه طوس
ای وصلتی مشكل آچان ای دردیمه درمان
ای باب رجا باب کرم ایت بيزه احسان
ای طوسی ايدن خلد برين حُجّت يزدان
گتموبدی قاپوندان بيری مأيوس و پريشان
قربان گوزيوه باخ منه ايت درديمه درمان
لطفوندی ايدن شاه وگدا قلبينی شادان
ای بحـرعطا جـود و كـرم بندۀ رحمان
ای باب رجا باب کرم ایت بيزه احسان
شاها بيزه لطف ایله که محتاج عطايوخ
كشكول اميد قولدادی مشغول دُعايوخ
مشتاق زيارت سفـركــرب وبـلايـوخ
جدّوندی حسين دينه فدا بيزده فدايوخ
ای جان جهان جانلارا جان مفخرايران
ای باب رجا باب کرم ایت بيزه احسان
ای عرش معلایه چاتان رتبه و جاهی
آدمدن ازل خلق اولونان نوری الهی
محشر گونی ای شيعه لرين پشت و پناهی
خادمدی سيزه «عدلی» اگر واردی گناهی
اميد شفاعت واريدی شافع عصيان
ای باب رجا باب کرم ایت بيزه احسان
ای كعبۀ ـ اهل وفاـ جانم رضا جانم رضا
ای ملجاءـ شاه وگداـ جانم رضاجانم رضا
🍃
🌾🌼
🍃🌾🌼
🌸🍃🌾🌼