زبانحال حضرت لیلا(س) مخمس گئتمگون سالدی سراسر قلب ائوینده شور علی گلمگون درد آرتیروب لیلایه یاتما دور علی سس دوشوب اخیامیده پیغمبره بنزر گلور خیمه دن چیخدیم نه گوردوم غملی بیر منظر گلور بیر عبا اللرده دور بیر دسته گل پرپر گلور مصحف قرآندی بو ، یا دوغرانوب اکبر گلور بختور لیلی اولوب مجنونیدن مشهور علی من سنه یوسف دئسم نقصان یتر اجلالووه مین زلیخالر قالار سرگشته تک بیر خالووه نقطه ی بسم الله قرآن چیخوب اقبالووه یوسف زهراسن اوغلوم خوش سنون احوالووه یوسف کنعان یانوندا وصله ی ناجور علی آیریلوب گئتدون سنی تاپشوردوم حی ذوالمنه مختصر گئتدون دونوب جیران باخیش باخدون منه ایستدیم بیرده ورام بوسه او وجه الاحسنه خیمه دن چیخدیم گلم گوردوم باخور عمون سنه گلمگه آردونجا اولدوم من اودی معذور علی موسی عمرانی خوشدور بو چوله دعوت ائدم ترک ائده سینانی بو طوره گلوب قویسون قدم لن ترانیدن گوره انی اراهو بیش و کم لامکانون نورینه اوخشار بیرآز احمد شیم بو جماله بذل ائدوب نوری او نور طور علی قامتون دیوان عشقه دلنشین ابیاتیدور خط و خالون آیه آیه مصحف آیاتیدور خلقا و خلقا وجودون خاتمه مرآتیدور دوغرانان اعضا دیورسن قبله حاجاتیدور من طواف عشقیده احرامیمه مسرور علی قاشلارون تشبیهیدور بیر جوت هلالی خنجره کیپریگون لشکر گوزون صهبادی صف صف لشکره یوخ گمان یاقوت رممانی چاتا بو لبلره مرحبا صورتگره ، الله اکبر اکبره عارضون چون بدر ، زلفون ظلمت دیجور علی امر مشکلدور که خالق خلق ائده تای اکبره شده ی مرجان دوزولمیش زلفووه خوش منظره حیفیدور بدری خسوفه قویما زلفون دوندره شانه ورماقیم بو زلفه قالدی اما آخره توز قونوبدور زلفووه ایکاش اولیدیم کور علی تز غروب ائتدون ندن ای بختیمون صبح اولدوزی تار ائدوب بو گلمگون اوغلوم گوزومده گوندوزی من گلاب و عطره بو چولده گمانیم یوخ دوزی وئر اجازه قوی یووم گوز یاشیمیله گل یوزی اوخشامازدیم من بله درد ایلوری مجبور علی هیچ یاراشمازدون بو دهر فانیه ای مه جمال قصر مینویه سنی لایق بیلوبدور ذوالجلال قامتیم بیر لحظه ده قاشون کیمی اولدی هلال بختمیله زلفیمون عنوانینه گلدی زوال آغ گونوم اولدی قرا ، قاره گونوم آغدور علی #نادرون وار حاجتی ایستر بو درگهدن صله بلبل باغ ولایتدور قونار گلدن گله سیز اونا باب کرم آچدوز دوشنده مشگله ئوز الوله نوکرین گل زورقین چک ساحله چون سلیمانون یانیندا گورسنوبدور مور علی ✍منکلام:استاد حاج نادر بابایی اردبیلی 🔴کانال رسمی عاشقان حضرت زینب«س» https://t.me/hazratehzeynab