شهادت امرینی ختم ایتدی تا او قوم رجیم ایدوبله سرعتیله امر غارتی تصمیم توکولدی خیمیه بیر وضع حالیله لشگر او داغدار اورکلر دوباره اولدی دونیم قیامت عالمی مشگل ایله بیر عالم اولا گرک دیاخ اونا صغرا بوییدی حشر عظیم عراق دشتنی دوتموشدی شور و شیون و شین او شور شینی گوروب شوره گلدی عظم رمیم محالدور گله شرحه حکایت غارت او نوعیله که ایدوب راقمان قصه رقیم امام قتلینه اقدام ایدوب یغشمیشدی هوای جیفه دنیائیله سپاه لئیم ایله جماعته فرمان غارت اولسا صدور سویار نه حالیله آنلار او حالی وهم فهیم دئسم که آغلادی گودال قتلگهده حسین سوزوم غلط دگی سلطان دیندی کف کریم او نازیله بویین قورخی گورمین بالالار باخاندا هر یانا دشمن گوروب نه خویش حمیم ایدنمیوب علما لشکرین سائین معلوم نقدریمش اونا عالمدی بیر خدای عظیم ائیگرمیدن بیری ببر وصله قسمت آلمازدی اولیدی خیمه لر اموالی سر به سر تقسیم اودور که الده چوخی تازیانه یا نیزه ایدردی غیظله بی حرمتانه قصد حریم بیری قوواردی قاچان بیر یتیمی باخمازدی که تیترر عرش عظیم آغلیاندا طفل یتیم بیری قاچوب یخیلاردی دوراردی تیترردی ز بسکه قلبینی وحشت آلوردی جانینی بیم او اضطرابی هنوز ایمدیده نشان وروری بهار فصلی چمنده گله دگنده نسیم او خوردا قیزلارین حالین گورئیدی زینب تک یقین قیامته دین امهات اولوردی عقیم اگر چه قاسم شهزاده دن حیا ایدیرم ولی اولیدی مشیتده اقتضای حکیم گرک عروسی قاچا چوللری دوتا آهی تاپولمیا اونا بیر رحم ایدن خدای رحیم ال آتدی من دئمورم گوشواره سین آلدی نه جراءتیله آچلسون او ماجرایه دلیم خبر دیور قولاقی پاره لندی قان آخدی شقاوتنده ز بس اول شقی واریدی مقیم یخلدی غش ایلدی مجتبا گوزوندن ایراق اولوب بهشتده رنجور اول امام علیم گلنده هوشه او شیرین دل ایتدی استشمام مشام جانه گلور بیر دل آشناسی شمیم گوروبکه عمه سی زینبدی آغلیان گوزیله بلالی باشین ایدوب داغلی سینه سینده ضمیم بنی امیه گورون جراتی هارا یتوروب همان او جراءتین عاجزدی شرحینه قلمیم الینده خنجری شمرین غلامی داخل اولوب او خیمیه که اولا پاسبان سزادی کلیم گوروب او خیمه ده بر نازنین وجود یاتوب اوزی مریض دی اونداندی خلقه فیض عمیم نجه مریض نه بیر حالنه نوازش ایدن نجه علیل نه بیر مونس و نه یار و ندیم نجه علیل نه بیر باشی اوسته آنین اوغان نجه علیل نه بیر شربت و دوا و حکیم نجه علیل که اونداندی هر دوای علیل نجه علیل که اونداندی هر شفای یتیم گنه او شان و جلالیله اول مقامیله علیل حالنه رحم ایتمدی او شوم زنیم چکوبدی غیظله سجاده سین یوز اوسته دوشوب او نازنین بدنی که اویودی عرشه قویم یخلدی ناطق قرآن ضعف حالینده او حالدن پوزولوب انتظام هفت حمیم ال آتدی تاجنی باشدان گوتوردی روح الامین دئدی نه لازمه دور تاج و افسر و دیهیم ویروبدی لشگره سعد اوغلی تازه دن فرمان بو خیمه گاهه وورون اود یانا گروه جهیم دوباره آتش نمرود شعله لندی او گون یانار اود ایچره قالوب یاندی آل ابراهیم همان او بارش درد و بلا یاغان چولده هوا یوزونده گوروندی همان او دودیله غمیم گلوبدی خدمت بیماره زینب عرض ایلدی که ای باباسی اولان جنت و جنانه قسیم ندور علاجیمز اود دوتدی خیمه لر یاندی اگر ایستیوبدی خدا بیز یاناخ اولاخ تسلیم بویوردی عمه چیخون چوللره فرار ایلیون یازیلمیوب یانار اود ایچره یانماق عهد قدیم داغلدی چوللره بیر حالیده بالا بالالار که آشیانی یانان قوش گرگ آلا تعلیم قاچوردی بیر بالا گوردی گلور سواره دوروب دایاندی ویردی سلام آتلیه ایدوب تعظیم یتشدی دامننین آتشین خموش ایلدی اذیت ایتمدی شاد اولدی اول یتیم الیم دئدی گل ایمدی نشان ویر منه نجف یولونی سن ایمدیکه من بی یاره ایلدون تکریم سوال ایلدی سرین جواب ویردی او قیز نجفده کی علی المرتضا بابامدی منیم روایت ایلوری راوی باخوب او دم گوردوم که ببر مجلله عورت بلند قد و جسیم گیرور یانار اودا دائم چیخور دئدیم یارب نقدر بوندا مگر وار علاقه زر و سیم پوزولدی حالیم اونون پوزقون حالنی گورجک او زار و مضطره اودلاندی واقعاً جگریم الیمده نیزه یوگوردوم قباقینی کسدیم که قویمیام یانا اخلاصیمی ایدم تقدیم گوروبکه چاره کسلدی دالی دالی چکلوب یوزون دوتوب گوگه عرض ایتدی ای خدای کریم بالام قالوب اود ایچینده ندور علاجیم بس اماندی چاره ایله چاره دن اوزولدی الیم اگر چه #شانی الون بوشدی مال دنیادن ندور مطابق نطق و کلام و طبع سلیم خدا کریم دی هر بیتوه ویرر بیر بیت حسین سونلره تقسیم اولاندا خلد و نعیم ✍منکلام:مرحوم استادحاج حسین شانی تبریزی 🔴کانال گیف مذهبی 🔴ایتا https://eitaa.com/kgifemazhabi 🔴تلگرام https://t.me/gifemazhabi 🔴کانال رسمی عاشقان حضرت زینب«س» https://eitaa.com/hazratehzeynab با ما همراه شوید✅