مدح حضرت فاطمه زهرا سلام الله علیها یازا بولمز الیمده کی خامه شرحِ حالِ جنابِ زهرانی جمع اولا اگر تمام نابغه لر وصف ایدنمز کتابِ زهرانی دفترِ عمرینه ووراندا ورق اولی منشورهء کتابُ الله خطبه سینده خطابه لری اولی انگیزهُ خطابُ الله هم رضاسی اولور رضا الله هم عتابی اولور عتابُ الله وای او بی شرم و بی حیایه اوزی گوردی قهر و عتابِ زهرانی خلقتِ خلق عالمینده گلوب چوخ عزیزه خانم بو دنیایه ویریلوب هاجریله سارایه امتیازات پایه به پایه ویروب اللهِ ذوالجلال ولی آیری بیر امتیاز زهرایه بیر حساب اوسته کلّ نسواندان آیروبدور حسابِ زهرانی مریمین شرحِ حالی قرآندا چوخ گوزل طرزیلن اولوب انشا کلّ نسوانیدن اودور اولا لیک زهرادور مریمِ کبری' او بیر عیسا آناسیدور امّا اون بیر عیسی' آناسیدور زهرا روشن ایلوبدی سورهء کوثر امتیازِ جنابِ زهرانی تک اوزیندن صورا بو دنیاده قویدی مریم گیدنده عیسانی لیک زهرا گیدوبدی اولادی دولدوربدور تمام دنیانی یازیلوبدور کتابِ فاطمه ده نامِ سادات یوخدی کتمانی صاحبُ العصر اوز کنارینده ساخلیوبدور کتابِ زهرانی حقّ احمدده کلمهء لَولاک گلدی سوی خدای اعظمدن فاطمه پارهء تنیمدی منیم قول واردی رسولِ اکرمدن بئله بیر امتیازیله مطلق اولی افضل بتول مریمدن ننگی یوخ بلکه افتخار ایلر اوپسه مریم جنابِ زهرانی بیر نجیبه خانمدور هر یرده بر ملا صحبتِ نجابتی دور بیر عفیفه خانمدور عفّتده عفّت پرده دارِ عفّتی دور بیر خانمدور مقامِ عصمتده هامی عالَم گواهِ عصمتیدور عصمتی خلق ایدن او عصمتدن یارادوبدی نقابِ زهرانی ادبین ذکر ایدم حیا ایدورم ادبین آخر و ازل سوزیدی نه دِلیله دیوم حیاسیندن چون حیائیله عصمتین گوزیدور عفّتین دیمم بولور کی هامی بیر خانمدور عفّتین اوزیدور نه دیوم من گرک حجابین اوزی دیه وصفِ حجابِ زهرانی گتورردی گورنده فاطمه نی جوشه قلبینده مِهرِ طاهانی باغرینا جان کیمی باسوب گل تک بوس ایدردی جمالِ زهرانی یوزی زهرا یوزینده سویلردی سنه قربان اولا آتان جانی شانه ایلردی دست رأفتیله زلفِ پُر پیچ و تابِ زهرانی بیر خانم که بیلَردی پیغمبر عزّت و شوکت و جلالتینی سوز باشی سوز سالوب ایدردی بیان قیزینین قدر و قُرب و قیمتینی حیف بیر عدّه ناکس و نادان سیندوربلار حریمِ حرمتینی آچدیلار بابِ ظلمی اودلادیلار نارِ ظلمیله بابِ زهرانی نه قاپی یعنی فاطمه قاپوسی آدلانوبدور جهاندا بابِ کرم نه قاپی واردی اَندرونینده حسنِین و علی امامِ امم ساخلاموب احترام و حرمتینی قیل و قال ایتدی قومِ لایعلم اوجالوب قیل و قال آرتیردی قلبیده اضطرابِ زهرانی دئدیلر بیز بو بابی یاندوروخ باخماروخ وار ایوده بو آل الله وردیلار اود یانوب کرم قاپوسی چرخِ مینایه گیتدی دودِ سیاه یانوب اود قیزاردی مسماری آتشِ سرخه دوندی یاالله سانجلوب یاندروب یانان دلده آرتوروب التهاب زهرانی پنجهء نحسین آچدی زاغِ سیاه گُلِ طاهانی زخمدار ایلدی غنچه وقتینده غنچهء ترینی شاخسیندن قیروب کنار ایلدی سینه سیندن گلابِ سرخ آخدی دوشدوقی خاکی لاله زار ایلدی بئله بیر صحنه ایلدی غارت قلبدن صبر و تابِ زهرانی او یانان بابین آستانینده دیمورم نولدی ایتمرم صحبت قاپی سیندیران قوی پنجه پشتِ درده ضعیفه بیر عورت قالدی نه حاله بولمورم یارب او فداکار بانوی عصمت اوجالوب ناله سی آلوب فضّه گوشِ جانه خطابِ زهرانی گوردی فضّه دیور خانم زهرا ویر خبر داده بوالحسن گلسون غم شریکین یخوبدیلار یارالی دردِ پنهانیمی بیلن گلسون گوز یاشیم قان اولوب آخور یوزیمه مِهریله اشکیمی سیلن گلسون رشگ ایدر یاغدیران بولود گورسه گوز ایوینده سحابِ زهرانی باغبانِ وفا گلوب گوردی آستانه اولوبدی گلشنِ غم هر طرفدن گلابِ سرخ آخوری یخیلوب غنچه ئیله گُل باهم داغلانوب قلبی صورتِ گُلینه گوز یاشین توکدی ایلدی شبنم اوزادوب عاطفی الیله سیلوب یوزده کی اشگِ نابِ زهرانی دشمن ابرِ سیاه تک خسفِ تامّه برجِ عصمتی سالدی اوزگه حالیله مِهرِ دین گلدی دیزی اوسته اونون باشین آلدی اوندا یاسلی عزالی اولدوزلار نه دیوم من نه حالته قالدی گوردیلر آز قالور اولا غمندن منسکف آفتابِ زهرانی آغلاسون اوز ایوینده قویمادیلار غصّه سی آرتدی قلبِ سوزاندا بیر آغاج کولگه سین ایدوب مسکن سس چکوب آغلادی بیاباندا اونیدا کسدیلر گیدوب ایتدی عمریجه ناله بیتُ الاَحزاندا تا دَمِ مرگ ایلیوبله حرام اشقیا خورد و خوابِ زهرانی #تائبا دردیله دولوب اورگون وار کیمون ایلیه بو درده دوا وُور یانان قلبیله یانان قاپونی ، سسیوه سس ویرر خانم زهرا قاپوسی رحمت و کرم قاپوسی اوزی محبوبهء حقِ یکتا الی بوش اولمیوب اولماز عالَمده دوگسه هر کیمسه بابِ زهرانی ✍منکلام:مرحوم استاد حاج صادق ابوالحسنی متخلص به تائب تبریزی