دانشگاه کربلا ای اولان عشق اهلینه طور تجلا کربلا سنده وار یئتمیش ایکی نور تولا کربلا بیر منا وار سنده که یئتمش ایکی قربانی وار شیعه نین سنده سوسوز قانه باتان سلطانی وار عالمی سیراب ائدن لعل لب عطشانی وار سنده دور قولسوز یاتان شرمنده سقا کربلا کربلا سنده محبت اهلینین عنوانی وار تورپاقین قانیله الوان دور گوزل برهانی وار هر مریض و دردمندین دردینین درمانی وار سنده دور هر بیر یارا قلبه تسلا کربلا کعبه دن آرتیق دی بو دنیاده شان و عزتین عاشقین چوخدو هامی دیللرده واردی حسرتین کیمای عشق دیر، خاک شفادیر تربتین عالمی حیران قویوب بو سر عظما کربلا گلستان اولسا جهان ،شور و طراوت سنده دی عالمی روشن ائدن نور هدایت سنده دی گوئیا اسرار و آثار قیامت سنده دی نکته سنج اولسا بیری وار چوخلی معنا کربلا کربلا وار سنده دانشگاه احساس و شعور فارغ التحصیل اولار کیم ائتسه تاریخین مرور قتلگاهین هر زمان گر ائتسه ذهنیمده خطور اود سالار بو مجمر قلبه تمنا کربلا معرفتله گلسه هر کیم کوی مهر و وحدته یوخدی ذره شک و تردیدی چاتیبدیر عزته باشین اگمز کیم حسینه تابع اولسا ذلته باش وئرر ائتنمز ولی اوز نفسین اغوا کربلا کربلا سنده ولایت اهلینین مولاسی وار قدرده عرش خدا سن، گرچه غم دریاسی وار کیم حسینه دیل وئریب، باشینده حق سوداسی وار آرزو ائیلر سنی صبح و مسا یا کربلا کربلا سند مهد عزت سن ،مطاف انبیا سنده دفن اولموش یارالی نورچشم مصطفا عالمی درده سالیب سنده یاتان تشنه فدا یوخ سنین اجلالیوه عالمده همتا کربلا کربلا سنده اولان اللهی چوخ یاد ائیلییر یاده سالدوقجا غم و اندوهی فریاد ائیلییر مکتب سرخ حسین دنیانی آباد ائیلییر مدعی اولسون کرگ هر یئرده رسوا کربلا کربلا سنده نه قدری کهربا تک جذبه وار چاتما توپراقیوه احرار اولوبلار بیقرار نار عشقه یانماقا دیوانه لر پروانه وار هر کس اوز عشقی قدر ائیلییر تقلا کربلا کربلا اولسون سلام و تهنیت احساسیوه آغلارام تا عمر وار ظلمیله پرپر یاسیوه گلمیشم عرض ارادت ائتماقا عباسیوه هاردا وار بیر بیله سقا بیله مولا کربلا #هوشمند #مدهوش