عفو ایله على الده یوخ امکانی ربابون 🥀🥀🥀🥀🥀🥀 زبانحال رباب به طفل شیرخواره اش سیفی اردبیلی. عفو ایله على الده یوخ امکانی ربابون آغلار گوزه قربان یورولان جانی ربابون . . ای باغ حیاتیمده آچان نرگس خوشرنگ اقبالیمون عرشینده گزن مرغ شباهنگ ورما قوریان دوشلریمه حسرتیلن چنگ سو ایچمسه دولماز صوده پستانی ربابون . . آیدین گونوموز شامه دونوب دست خطادن مشکلدی بالا جان قوتاراق دام بلادن گُل لبلروی سوز عطش سالدی نمادن ایکاش اوغول عمرى اولا فانی ربابون . . تاب ایله بیر آز نایره ی محنته اوغلوم توکمه بو قدر اشکووی مه صورته اوغلوم سو ایچمگمیز قالدی بیزیم قسمته اوغلوم اقبالی یاتوب تیره دی دورانی ربابون . . دردوندن على مجمر سینمده شرر وار چوخ غم یمه دلسیزلرون آهینده اثر وار هر بیر شب ظلمانیه آخرده سحر وار شاید سحر آچسا اولا درمانی ربابون . . بختیم مدد ائتسه تاپارام غصّه دن ایمن سنده سو ایچرسن قوتارار ناله و شیون اما باخشوندان بیلورم ہو گئجه لیک سن قربان او گوزه دیده ی گریانی ربابون . . ایکاش على غنچه ی عمرون گل اولیدی سنّون یاریدان باشه چاتیدی ایل اولیدی منده صود اوغول سنده ده شیرین دل اولیدی غم چنگینه دوشمِیدی گریبانی ربابون . . افسوس ضیا قالمادی اقبال اوجاقیمدا یاندی اَریدی شمع حیاتیم قوجاقیمدا ایکاش ایمکلیدون اقلاً قاباقیمدا توکمیدی یوزه اشکینی مژگانی ربابون . . قویسیدی اَمکدن گوره سن فایده دوران آچسیدون ایاق یول یرسیدون بالا الان آتدوقجا قدم منده دیردیم سنه جان جان اولمازدی بئله آرزدا نقصانی ربابون . . افسوس فلک سالدى خزان صحن بهاره قان آغلاماقون تشنه لیگوندندی اشاره ئولسون ننون اوغلوم، تاپا بیلمور سنه چاره سؤنمه هله ای شمع شبستانی ربابون