شِه سیروی ِ زلال ِ او ره خوامبه ؛؛ وِنه لَرگ و توسکای چو ره خوامبه ؛؛ نِسوم ِ دله ی ، اِجار و پایه ؛؛ سرتلار ِ گندم و جو ره خوامبه ؛؛ زردِ رَف ِ دله ، ممرز و موزی ؛؛ بِلنده افرا و کلو ره خوامبه ؛؛ گتیر باغ ِ دله ، بَپته خربزه ؛؛ کیمه سر ِ شوپه و شو ره خوامبه ؛؛ کوتنا دشت ِ آیش ، پِر پِر ِ بینج ؛؛ وِنه طارم دونه ی بو ره خوامبه ؛؛ بهار ماه شو ، سیروی ماهی تجه ؛؛ کِرفا کَشی ، فِنر ِ سو ره خوامبه ؛؛ لَرگ ِ ریشه ی پِه ، زرد زرد ِ اورنج ؛؛ لَپک قِرزم ، دراز مِرو ره خوامبه ؛؛ قَلِک ِ قِرزم ِ بِچا بِچا او ؛؛ زومی او بِنی و حَسنو ره خوامبه ؛؛ یاد ِ قرزم لا زن ، بِموئه مِره ؛؛ بنزین چَلِک ، پِر ِ لَرگو ره خوامبه ؛؛ کیجا هون مَرز ِ سَر ، قطار به قطار ؛؛ وِشون ِ سَر ، سِرخ ِ اَفتو ره خوامبه ؛؛ عیدی پیشی جم بینه تکیه پیش ؛؛ مِرغنه جنگی و هو هو ره خوامبه ؛؛ قدیم ِ خاطرات ، بِمو تِنه یاد ؟ تِه تِک ِ خنده ، چِش ِ خو ره خوامبه ؛؛ محمد ظاهری کوتنایی . مهر : ۴۰۲