#زمزمه #ترکی آنا یا فاطمه یاتما اویان دور حسینین گور ننوعی باغریقان دور منی بیر ساقلیقون تک آل کناره منه درد فراقین چوخ گران دور . (گوزون قربانی یاتما حسینی گوزدن آتما صفالی ماهتابیم سپهر غمده باتما) آنا یا فاطمه یاتما اویان دور . . . رضا اولمازدون ایلوم ناله بیر آن عذاره گوز یاشیم ایمدی روان دور سسیمه ایمدی سن سس ویر آناجان منی آز نار هجرانیله یاندور . (منی یاندیرما یاخما آخان قان یاشه باخما دان اولدوز تک سپهرِ غم و غربت ده آخما) . . . سنیدی قلبیم اولمازدون رضا سن او قلبیم لخته لخته ایمدی قاندور حسن قارداشیم آغلار بیر طرفذه آنا اولادیوه محشر عیاندور . (ئورک میناسی قاندی یوزه اشکیم رواندی نه من کی مجتبانین ایشی آه و فغاندی) . . . آچوب باش زینبین بیر یاندا آغلار یولار زلفین قدی غمدن کماندور اولوب کلثوم اویاندا مو پریشان آنا وای زینبه ورد زباندور . (قالوبدور زینب ؛آغلار بو غمده سینه داغلار فراقه سیل اشکین باجیم رخساره باغلار) . . . آنا چوخ درد و غم چکدون جهاندا منیم سنسیز ملالیم جاوداندور قولین سیندی قاپون یاندوردی دشمن سنین بو غملرین دلده نهاندور . (ئورکده یاره قویدون بیزی آواره قویدون نه گلدی یول گئدنده الون دیواره قویدون) . . . اولوب اون سگز ایل عمرین جهاندا زبس غم چکموسن قدین کماندور اوزین گیتدون خلاص اولدون اگر چه عیالین صبح و شامی باغریقاندور . (خلاص اولدون جفادن قوتولدون اشقیادن ولی بولمم ندن سن ال ئوزدون مرتضادن) . . . منی سندن صورا مقتول ایده لر ایدن بو ظلمی قوم کوفیاندور کسر بو باشیمی شمر جفا جو زبس بی رحم مخلوق جهان دور . (منه عالم لر آغلار غمیمده یم لر آغلار محرم لر گلنده قرا پرچم لر آغلار) . . . باجیم زینب چیخاندا خیمه لردن گورر قانلی باشیم نوک سنان دور یانار آغلار توکر رخساره قانیاش باجیم زینب منه چوخ مهربان دور . (جدایه باش ووراللار او باشه داش ووراللار دوشنده درده ،قارداش باجیلار،باش ووراللار) . . . ویررسعد اوغلی شمر دونه فرمان ووروب اود خیمه و خرگاهی یاندور قزین سسلر سنی اولدم هرایه آنا گل زینبین حالی یاماندور . (اماندی گل هرایه منای کربلایه اودم گل کی باجیمی قشون آلمیش آرایه) . . . ئولوب قارداشلاریم یوخ پاسبانیم آلان اطرافیمی بو کوفیان دور وورار شمر لعین قمچی باشیمدان دیر زینب نولوب نه الامان دور . (جوشار غم محفلیمدن نوا قالخار ائلیمدن امان جور فلک دن امان شمرین الیندن) . . . چکر شامه کیمی چوخ درد و محنت یزید بی مروت کامران دور دوشنده خوردا قیزلار ناقه لردن قالان چوللرده سسلر ساربان دور . (گرک گوزیاش سئل اولسون جهان یانسون کول اولسون روا دور اهل بیته خرابه،منزل اولسون) . . . حسین آدین «حسینی» ایلوب ازبر بو اسم پاک اونا ورد زبان دور شفیع محشره محشرده محبوب بو عالمده حسینه آغلیان دور . («مصیب»یاز سوز،آغلا ریا قاتما دوز آغلا حسینون ماتمینده گئجه هم گوندوز آغلا) . . . حسینه آغلا هر قدر عمرین اولسا حسین اوددان سنی بُل قورتاران دور عزادار حسین یانماز جزاده بکا ابکا بونا شرح و بیان دور . (حسین تاج سران دی صفای روح و جان دی بیلون یانماز او کس کی حسینه آغلیاندی) . ✍️سعدی زمان