احوالات غسل دادن حضرت فاطمه زهــرا سلام الله علیها وقت او وقت اُولدی علی، حافظ دین مدنی مغسلون اوستونه قویدی یارالی فاطمه‌نی گجه‌نون عالمی غسل ایلیه یورقون بدنی تا کفن پوش اولا آئینه قرآن زهــــرا بوردا بیر نکته‌ی باریک وار ای اهل شعور یازا بیلسم هامی عالم ائلیر شیون و شور آنانون غسلونا جام اَلده اوشاقلار سُو داشور اِئدوب آهولرینی گور نجه گریان زهـــرا دیل گلر گلمز اُودم گلدی دیله شاه حجاز دئدی مجنونینه دوزدور کی ائدر لیلا ناز ولی سن ناز ائلمه، آچ گوزون ای معدن راز باغریمی قان ائلیور محنت هجران زهـــرا بـو گجـه کاش منیمده چاتا پیک اَجلیــم نجه آیا سنی من غسل اِئله‌ییم آی گوزلیم آنـد اولا یاره‌لری پهلولروه تیترور اَلیــــم هر زماندان چتین اولموش منه الآن زهــرا قاف عشق اوسته باتوبسان قانا عنقا مَثَلی اوزولوب شاه ولانون بو گجه اَلدن اَلی یاتما آچ گوزلروی گور نه آدامسیزدی علی آیریلیق دردی اِئدوب حیدری نالان زهـــرا دئنن ای ماه اُولوب یاسمنی هاردا یوزون کیم ویروبدور سنی آیا بویانوب قانه گوزون گیزلدیم قوی یوزوی زینبیم ئولدوردی ئُوزون گُورمیه سیلی یرین اُول مه تابان، زهـــرا نجه ساکت اُوتوروب یاریمه یاس ساخلامیوم نجه هجرونده سنون اشکی یوزه باغلامیوم نجه دیل داغلامیوم من، نجه قان آغلامیوم بورئیوب مغسلی سینوندن آخان قان زهرا یری واردور سسیمه سس قوشا اهل ملکوت بو گجه گیزلین اولان غصّه‌لرون اُولدی ثبوت ایندی بیلدیمکی دوتاردون نیه بیر اَللی قنوت مرتضی قمچی دگن قوللارا قربان زهــرا دئمورم اَگنوه سن رخت حیـاتی گئیه‌سن یا سُولان گُلشنیـمی بیـرده بـهار ایلیه‌سن گوگلوم ایستور منه بیر یولدا عم‌اوغلی دئیه‌سن وئره جـان عاشقه تا نغمه جـانان زهـــرا «قاسمی» گوهر نفسه بو قدر وئرمه بـها قویسا هرکس آدینی شاعـر شـاه شهـدا گرک اوّل ئوزونون روحِ حسینی‌سی اولا ائلیـه تـا اونـا اَلـطافینـی ارزان زهــــرا ✍منکلام:کربلایی بهزاد قاسمی اردبیلی #شهادت_حضرت_زهرا_سلام_الله_علیها #فاطمیه