به به مشام جانه نسیم صبا گلیر صبحون هواسی روحه عجب آشنا گلیر شعبان قوتاردی سس گلیری عرش و فرش دن ای اهل دل قوناق سیزه ماه خدا گلیر بیر آی دی سربه سر گتیریر خیر و مغفرت باشدا باشا عنایت و لطف و صفا گلیر دعوت ائدیر قوناقلیقینا ذات کبریا سرسفره سینده رحمت بی انتها گلیر بو آیدا لطف حقدن عمل لر قبولیدی فیض اجابته یئتیشیر هر دعا گلیر لبیک عرشدن یئتیشیر خاطی بنده یه دیلدن هاچان ترنم اِغفرلنا گلیر الله یانیندا وار بو آیین چوخ فضیلتی ساعاتی بی نظیردی چوخ پربها گلیر هر آن گلنده ماذنه لردن اذان سسی گلزار جانه رونق و روحه جلا گلیر هر کیم که فیض دعوت حقه بلی دییه حقدن کمال منزلت و اعتلا گلیر قرانی حق پیمبره نازل ائدیب بو آی انسانلیقین طریقینه نور و ضیا گلیر بیر آیه گر اوخونسا برابردی ختمیله قرانیدن اورکلره فیض شفا گلیر مؤمنین لر سلاح و نجاتی دعاده دیر هر دردیز اولسا فیض دعادن دوا گلیر آباد ائدین اورک لری صدق و سلامیله باران مثالی رحمت حق دن عطا گلیر قدرین مین آیدان عزتی و قدری اضافه دیر احیا ائدن جماعته مین مرحبا گلیر #بداهه #محمد_هوشمند ادامه دارد