ورود به ماه محرّم دئدیم هلاله نه باعثدی قامتین خمدور جواب وئردی مگر بولموسن محرّمدور دئدیم نه‌دن اریوب اولموسان ضعیف و نحیف دئدی سالان منی بو درده هاله‌ی غمدور ایدوب احاطه سراسر هلال هاله مثال هلاله هاله‌ی درد و ملال، توأم دور دیدیم شفقدن اولوب دامن فلک گلگون دئدی بو سرّی سؤال ائتمه مبهم‌دور شفق دگول، شهداء قانی‌دور که شام و سحر اولور مشاهده، سرخی، دلیلِ محکم‌دور دگول بو خطّ شعاعی، تیکوب عزا علمین سپهر بامینه خورشید، قانلی پرچمدور طلوع صبحده ظلمات مغرب شامی سالوب خیالینه آفاق، اودور که مظلم‌دور اولوبدی کرسی عرش اوسته نوحه‌خوان جبریل ایدوبله فرش، عزاخانه، عرش اعظمدور وورور صلای محرّم جمیع ذرّاته سماء و ارض بو ماتمده غرق ماتمدور او بزمه حاضر اولان انبیای ذوالأکرام ایدن اقامه‌ی ماتم رسول اکرم‌دور گئیه‌ن قراسینی حوّا و مریم و سارا گلن عزاسینه نوح و خلیل و آدم‌دور حسین‌حسین سسی دولدوروبدی شش‌جهتی دگوب بیری-بیره عالم، بیر اؤزگه عالمدور به سان کعبه سیه‌پوش اولوبلا خلق جهان دمادم اشک‌فشان دیده‌لر چو زمزمدور اولوب بساط سلیمان کربلا بر هم بساط عیشی بو ماه عزاده برهــم‌دور اولوب علی‌قیزی زینب بو آیدا شمره اسیر او زینبی که کمینه کنیزی، مریم‌دور دؤنوب بو آیدا جوان قاسمین طویی یاسه خضاب خونیله زلف سیاهی پُر نم‌دور بو آیدا شبه پیمبر شهید اولوب ناکام قیامته کیمی گر آغلیاق گینه کمدور یِتوب امامه مصیبت مصیبت اوستوندن نظرده ایمدی همان حالتی مجسّمدور ییخوبلا قولسوز علمدارینی فرات اوسته یانان بو حسرته شطّ فراتِ علقمــدور یئته‌ن زمان باشی اوسته گؤروب نفس گلمور هنوز گلماغی قانین ولی، دمادمدور دولوبدی قان گؤزونه دیده‌دن آخار یوزونه گول اوزره بس دئیه‌سن قطره-قطره شبنمدور الین قویوب بئلینه دلده ذکر وا عبّاس دئدی بوکولدی بئلیم آه قامتیم خمدور الون الیمدن آلوب ائتدیلر شهید سنی بو قوم ایمدی منیـــم قتلیمه، مصمّمدور سنون گؤزونده منم، اؤز گؤزونده سن منی گؤر بو پرده - پرده ی چشمونده، خونِ دیده‌م‌دور مداد سرخیله سینه‌نده آیه‌ی قربان یازوبلا صفحه‌ی قرآن کیمی مُتَرجَمدور منیم یولومدا اؤزوم شاهدم شهید اولوسان مقام منزلتون حق یانوندا معظمدور ولی نه فایده سنسیز حیات دنیادن منه حیاتدن ایمدی اؤلوم، مقدّمدور اگر یاتوب علمون ایتمه غم قیامتده او گون لوای شفاعت سنه مسلّمدور نفس ویریلدی گلوب هوشه ائیلیوب احساس یانیندا حاضر و ناظر ولیّ اعظمدور سَرِ مفاخرتین عرش ساقینه یتوروب گؤروب امام حضورینده چوخ معظّمدور باشین گؤتوردی دیزیندن ایاقینه قویدی محبّت عالمی‌نین سرّی اؤزگه عالمدور یوزون ایاقینه قویدی دئدی جُعِلتُ فداک وسیله ی شرفیم بو غبار مقدمدور دوتوبدی گؤزلریمی قان، گؤرنمیرم یوزووی بو آرزوئیله گؤیلوم هنوز خرّمدور کی اؤز الینله گؤزومدن بو قانی پاک ایده‌سن گؤرم جمالیوی بیر دم که دم، همین دمدور مرحوم فقیر خویی #دئدیم_هلاله #محرم #فقیر فایل صوتی👇👇👇 #اشعار_ترکی گلچین زیباترین اشعار و نوحه های ترکی https://eitaa.com/joinchat/2348744791Cd1e41b0233 ─┅─⊱✾♡✾⊰─┅─ کانال اشعار عاشقان حضرت ابالفضل(ع) مدیریت کانال:شعبانپور @Haram75 اللّٰهمَّ عَجِّلْ لِوَلِیِّكَ ٱلْفَرَجَ @Hazrate_Abalfazll ---⊱✾♡✾⊰---