هدایت شده از صفحه رسمی رحیم فیضی
💢 #جریان_دیر_و_راهب_و
#راس_مبارک_امام_حسین(ع)
⬛️
ای گئدن دیر و کلیسایه حسین(۲)
لطف ائدن خادم عیسایه حسین(۲)
روحِ خاتَم‌سن آقا
شاه‌ِ عــالَم‌سن آقا
⬛️
دوردی راهب یوخودان نیمهٔ شب
اولدی مشغول ثناخوانیِ رب
ولی بیر منظره‌نی گوردی گوزی
فکر ائدوب محشر اولوب یالَلعجب
آز قالوب روحی اوچا، جانی چیخا
گرم ائدوبدور بدنین آتشِ تب
سالدی غم، راهبی غوغایه حسین
سن نظر قیلدون او تَرسایه حسین
روحِ خاتَم‌سن آقا
شاه‌ِ عــالَم‌سن آقا
⬛️
منبع نوره طرف قویدی قَدَم
بیرکسیلمیش‌باشا توش اولدی اودَم
باخدی گوردی اَلنوب اوستونه کول
اسیلوب تللرینه باد سِتم
ای دیلیم لال اولاسان ائتمه بیان
رحم ائله فاطمیه، یازما قلم
ساخلادی حرمت همسایه حسین
سالدی راهب باشینا سایه حسین
روحِ خاتَم‌سن آقا
شاه‌ِ عــالَم‌سن آقا
⬛️
گوردی گویدن یره حورادی گَلَن
خضر و الیاسیله موسادی گلن
دئدی یارب بو ئولن کیمدی مگر
وصل دیدارینه عیسادی گلن
او خانیم کیمدی که پهلوده الی؟
بیلدی که حضرت زهرادی گلن
سسلنور رحم ائله زهرایه حسین
دوشموشم گورنجه بلوایه حسین
روحِ خاتَم‌سن آقا
شاه‌ِ عــالَم‌سن آقا
⬛️
گوردی در اوج جلالت او باشی
گرم تسبیح و عبادت او باشی
نچه مین سکهٔ زر وئردی ولی
خولیدن آلدی امانت او باشی
شستشو ائتدی گلابیله صورا
عشقیلن قیلدی زیارت او باشی
سسلدی اوخشیوسان آیه حسین
جان فدا سن کیمی مولایه حسین
روحِ خاتَم‌سن آقا
شاه‌ِ عــالَم‌سن آقا
⬛️
اوخی قرآن منی مدهوش ائله گئت
معرفت جامینه مِی‌نوش ائله گئت
رشتــهٔ عشـقِ سعــادتگرووی
قلبیمون باشینه گَل جوش ائله گئت
اذن وئر تا که سنه نوکر اولوم
بو مدالی منه سَردوش ائله گئت
ای وئرن جنّته پیرایه حسین
عشقی محشر گونی سرمایه حسین
روحِ خاتَم‌سن آقا
شاه‌ِ عــالَم‌سن آقا
⬛️
ای هدایتگر و کشتیِّ نجات
مُرده روحه دَمِ جانبخشی حیات
(فیضی‌ام) شاعر دربارون آقا
آنامین روحینه گوندر حَسنات
ئوره‌گیم خامه‌دی، کیپریک قلمیم
گوزلریمدن آخان اشکیمدی دَوات
وئرمرم عشقووی دنیایه حسین
دعوت ائت کربِ معلّایه حسین
روحِ خاتَم‌سن آقا
شاه‌ِ عــالَم‌سن آقا
⬛️
#رحیم_فیضی_اردبیلی
ــــــــــ
✍ در سبکِ...
اویان ای یار وفاداریم اویان
ـ┅┅❅🏴💔🏴❅┅┅ـ
♡ ㅤ ❍ㅤ ㅤ ⌲
ˡᶦᵏᵉ ᶜᵒᵐᵐᵉⁿᵗ ˢʰᵃʳᵉ