عرض ارادت محضر امام زمان عج منی هجرونده گوزل خانه خراب ائیلموسن قلبیمی آتش عشقونله کباب ائیلموسن گوزلریم یاشی فراقونده یاغیش تک یاغوری گوئیا فصل بهاراندی سحاب ائیلموسن تک و تنها گزوسن کوه و بیابانی ندن نه سببدور منه بیر بیله عتاب ائیلموسن خلوتیمده او قدر آغلامیشام سندن اوزاخ کی گوزومده یوخومی همچو سراب ائیلموسن دوزدی یوخ منده لیاقت سنی دیدار ائلیوم گوزلریم کاسه لرین لیک پرآب ائیلموسن چکموسن درگهیوین سائلینه سن نیه باش ؟ اولمیا گوزدن آتوب یا کی جواب ائیلموسن اورگیمده دئیورم اولمیا زهرا بالاسی منِ نالایقی بیر نوکر حساب ائیلموسن؟ عرض حالیمدی بوسوز شِکوَه حساب ائتمه آقا هانسی تقصیره گوره رنج و عذاب ائیلموسن او مصفا چمنین بلبل #شیداسی منم گویلومی آلسان اگر چوخلی ثواب ائیلموسن #محمدرضا‌صادقی‌شیدا

(( ایران )) هماره فخریدور ایران منیم دیاریمدور سه رنگ پرچمی همواره افتخاریمدور جانیم مالیم اولا قربان بو خاک زرخیزه ئولنجه توپراقی هم شان و هم وقاریمدور حضور شاه خراسان صفا وئروب بو یره بو مُلکیده سبب جاه و اعتباریمدور باجیسی قمدا وئروب آیری زینت ایرانه کی لطف ومرحمت حیّ کردگاریمدور شهیدلرون قانی همواره پشتوانه سیدور او پاک قانلاری تضمین اقتداریمدور فدا اولوم بو دیاره زعیم و راهبری امام و قائد برحق و شهریاریمدور بو مُلکه کج باخا حاشا بیرینده یوخ جرات نه چون کی حصن امام زمان حصاریمدور یقین بو مُلکی چوخ ایستر کیم اولسا#شیداسی کی خاک پاکی منیم زینت مزاریمدور #محمدرضا‌صادقی‌شیدا