ولادت تا شهادت سمایه اوج ایدوب یاز ای قلم مقامی زینبون مزّین کتاب اولار یازولسا نامی زینبون قویان زماندا عالمه قدم اوگوهر ادب آلوب قوجاقه قنداقین پیمبر نکو نسب آدین چاقورسون ایستدی اونون رسول منتخب بیندی زینب آدینی همان او لحظه ذات رب اولوبدی امر حقّدن قویولدی آدی زینِ أب که یعنی زینت پدر اولولدی نامی زینبون نجه خانم مقامنه هامی جهانیان فدا نجه خانم وجودینه ایدوبدی فخر مرتضی نجه خانم حسینینه شریک غمدی برملا نجه خانم اونا آنا جناب خیرة النسا بو عزّته بو شوکته بو افتخاره مرحبا مقامی حشره تک اولوب اودور گرامی زینبون کتاب زندگیسنه کیم ایلسه اونون مرور گورر حماسه سر به سر، محالیدور گوره قصور او عمر پر فضیلتی تمام لمعه لمعه نور او قاف وصفنه قونا چتیندی مرغ هر شعور برای اعتلای حق بلا چکوب او فخر حور اولوب رضای حقچون چوخ اهتمامی زینبون سلام اولا او حضرتون قیامنه، قعودینه سلام اولا نمازینه، رکوعنه، سجودینه یوزون قویاندا سجدیه او عالم صعودینه او ذکر ربناسینه، او ذکر یا وَدودینه سلام اولا غیابنه، هم عالم شهودینه حقیقتاً خدا پسند اولوب مرامی زینبون قلم یازاندا آدینی گرکدی بی بدل یازا بجادی مدح نامه سین اوکلک لم یزل یازا اونی بتول اطهره صفاتده مَثل یازا بقای دین احمده وجودنی علل یازا سالان یزیدی تختدن اودور که ماحصل یازا فصاحت و بلاغتی اولوب حسامی زینبون کتاب عشقه آدینی قلملر ابتدا یازا اونی شریک نهضت شهید کربلا یازا ازلدن ابتلالره اونی ویرن رضا یازا حسیندن صورا اونی اسیر ابتلا یازا کلامنی فصیح اونون مثال مرتضی یازا متین و مغزداریدور یازا کلامی زینبون محالیدور که دیدۀ جهان گوره ایله خطیب قالوبدی مات نطقنه هامی سخنور و ادیب وروب زیادین اوغلونا اومجلسنده بیر نهیب جسارت ایلین زمان حسینینه او نانجیب ایدوبدی خوار و مفتضح اونی اوصاحب شکیب حسینی زنده ساخلا دی بلی قیامی زینبون عقیلة العرب تاپوپ لقب بلی او فاضله هم عالمه هم عاقله وار اشتهاری کامله وجوب مستحبیه اودور دقیقاً عامله نه فوته ویردی بیر گیجه اسارتنده نافله شداید مصیبته اولوب شکیب او عاقله شماره سیز مصیبته اولوب دوامی زینبون عقیلة العرب اونی هامی جهانیان تانور مقام صبریده اونی زمانه قهرمان تانور آخان او خون اطهر حسینه پاسبان تانور اسیر ظلم اولانلارا کفیل مهربان تانور مفسر کلام حق، خطیب خوش بیان تانور که گوئیا خانملارا بودور پیامی زینبون چاقورسا بدحجاب اولان منی اگر دگل مجاب محالیدور که حاجتی اولا یانومدا مستجاب حجابه خاطر ایتموشم قبول رنج بی حساب آنام بتولدن بودور زنان عالمه خطاب وقار و زینت زنان دیوب حجابدور حجاب حجابی تاپشوروب گیدوب شهیده مامی زینبون بو زینبی گورون نجه سالوب بلالره فلک اولوبدی مبتلای غم سالوب باشا قرالچک ئولوب کنار شامده وطندن، ایلدن آیری تک دولاندوروب گوزون خانم ئوزونه گورمدی کمک سیخلدی قلبی غصه دن اولوبدی لخته قان اورک بروزه گلدی تازه دن غم عظامی زینبون دولاندوروب یوزون اودم خانم بسوی کربلا حسینه درد دل ایدوب بو دیللریله گوئیا دیدی حسین هایانداسان چتین زماندی ای اخا رضا گل اولما چوخ باخا بو منتظر گوزوم یولا باخا اومه جمالوه دوباره بو غم آشنا یته دوباره ایستیور سنه سلامی زینبون حسین کنار شامده باجون گل انتظار ئولور گوزتلیور یولون سنون غریب و بی قرار ئولور نه وار گوزونی باغلیان نه یار و غمگسار ئولور باشندا یدّی قارداشین قراسی سوگوار ئولور رقیه نازدانوه اولوبدی همجوار ئولور بوعمرنون یتشدی گل گور اختتامی زینبون حسین ورقلیور باجون بو خاطرات دفترین که خاطراتده گورور او شمر الینده خنجرین گورور او بی‌حیا کسور سنون او رأس اطهرین اوجالدور عرشه ظلمدن نواسین آل حیدرین گهی او خنجر ستم کسور بو زینب اللرین قتیل شمر دون اولور گهی امامی زینبون خانم توجه ایلیون بو روسیاه نوکره کرمله، لطفله باخون جزا گونونده «اکبره» الینده خیر عمل یوخی گلنده روز محشره شفاعت ایلیون اوگون بو نوکر محقّره یوخومدی طاقتیم منیم یانام او نار کیفره روادی بو مگر یانا اودا غلامی زینبون منبع:کتاب رهروان عاشورا #حضرت‌زینب‌کبری سلام الله علیها #اشعارحاج‌اکبرغفاری‌زنجانی #ولادت‌تا‌شهادت‌ ┏━━━ 🍃🍂━━━┓ eitaa.com/azo9zl ┗━━━ 🍂🍃━━━┛ https://eitaa.com/joinchat/3210543909C9675648560