ــــــــــــــــــــــــــــــــــــــــــــــــــــــــــــــــــــــــ به نام خدا #ورود_به_ماه_محرم #گلواژه_های_اشعار_ترکی الله الله گنه باشـلاندی محرّم دهه سی دهه ی شاه شهیـداندی محرم دهه سی آیلار ایچره مه تاباندی محرم دهه سی گور حسین سفره سین احساندی محرم دهه سی آدی گلدی گــوزوم ایســـلاندی محـــرم دهه سی ای دادان سفره ی احسانیده زهرا دوزونی آچ محـرم علمـــین اشگیله یو آل توزونی آغلیان گوزلره باخ یاد ائله عشق اولدوزونی بو قرا پرچمین آلتیندا کسون قوچ قوزونی پرچـــم عشـــقه نگهباندی محرم دهه سی ای ادب مشـتریسی گــوزله عوام اولمیـاســـان غمی یاددان چیخادوب شادلیقا رام اولمیاسان باخ امامــین ســؤزونه ضــــدّ نظام اولمیاسان سعی ائله منحـــرف از خـــطّ امـام اولمیاسان بویوروب محیـــی ایــراندی محــرم دهه سی بیزه هرنه یتیشوب اهل نظردن یتیشوب وجهه بو مملکته صبر و ظفردن یتیشوب نصرت ایرانه محـــرّمله صفردن یتیشوب شهدایه اؤ شرف بیر صودامردن یتیشوب اصغرین قتلیــنه اعلاندی محرّم دهه سی دئمـــورم الده اولان عزّتیوه ناز ائلمه دئمـــورم پرچم ایرانی سرافراز ائلمه دیئرم فرعی دوتوب اصلیدن اعراض ائلمه قافیه عیـــبینی دوتما هنر ابراز ائلمه شعریده قافیه گرداندی محرم دهه سی آقاما قـــربان اولوم ایرانی پیروز ائلدی باشی دالدان کسیلوب ایمانی پیروز ائلدی نِی ده قرآن اوخودی قرآنی پیروز ائلدی بلی اسلامی حسینون قانی پیروز ائلدی بیل اؤ شمشیری یخان قاندی محرم دهه سی فجر حسین نور حسین جلوه ی منهاج حسین دوغولان گون ائلین گویلره معراج حسین شهدا باشینه قانیله قویان تاج حسین وئردی جان وئرمدی اهل ستمه باج حسین اؤ اوجا همّته برهاندی محرّم دهه سی دلده عالم بویی سؤز وار گچورم سوزلردن عشــق مولا آییــــرار ایری لری دوزلردن ائتمدی شرم اوخ آتان بیرجوت آخان گوزلردن گوزیاشی چاتدی ربابه گجه گوندوزلردن ننه احوالینه حیـــراندی محرم دهه سی اوندا که الدن اباالفـضل علمی دوشدی یره اوخلانان مشگی حسین گتدی ئوزی خیمه لره العطش دلده هامی تیکدی گوزین صودامره گوردولر گوزلر آخور جانی دوشوبدی خطره اؤ غمه ایندیده سـوزاندی محرم دهه سی خیمه لرده دئــدی مولا ندی شیون بیلورم وئردون اول طفلی منه دردینی دلدن بیلورم ای رباب آغلاما من غنچه وی گلشن بیلورم سن ئوزون یورما بالامون دیلینی من بیلورم غمه دؤز دهّه ی هجراندی محرم دهه سی سیردن کاش قالیدون اؤ گون ای چرخ کهن گور هارا چکدی حسینون ایشی ایام محن سسینه وئرمدی سس چول دولوسی اهل فتن صودامر بـــیر بالا اولدی اونا لبّیک دیین گویده قوشلار آقاما یاندی محرم دهه سی سس دوشوب لشگر آرا ناظر اولون جریانه باغبــان عــلوی گل گــــتورور میــــدانه قونداق اوخشـــوردی قوجاقدا ورق قرآنه دئدی بیر آز سو وئرون بو دوداقی عطشانه دیلی یوخدی سیزه مهماندی محرم دهه سی کاش سعد اوغلی دییدی آقا گئت باخما سووا آب دریا قوتارار جــرعه سو وئرساخ بالووا سسـلدی حـــرمله نی تا قانــی قانیله یووا دئدی چوخ ضربه گوروب هاشمی لردن بو قوا اوخون آت موقـــع جبراندی محرم دهه سی حــرمله دیزلرینی وردی یره یوخ دئـمه دی شـیــرخواره بالیا نیلـیه جاق اوخ دئمه دی اوخ گلوب دگدی بوغازدان بالا هئچ اوخ دئمه دی دوداقی گولدی بیر آز، آغلامارام چوخ دئمه دی عالم اول گولماقا گریاندی محرم دهه سی کیم گوروب جانی چیخاندا اوشاقین گولماقینی کیم گوروبدی سو یانیندا بالیقین ئولماقینی گوردی زهرا آقامین قان یارادان سیلماقینی بالانین دردیــنه پیکانی دوا بیلمـــاقینی دئدی اوغلوم بالان اوخلاندی محرم دهه سی جان بالا غملی بالا اوغلوی آز باغریوا باس فاطمه سس وئره نوندی بو ندایه قولاق آس دئمه عباسیم ئولوب ایلمه تکلیق احساس آلا بیلمز قوجاقا اوغلووی قولسوز عباس منه وئر جان سنه قرباندی محرم دهه سی جان بالا صــبریوه گویده متعجّبدی ملک بیر اووج قان گویه سپدون بزنوب قانلا فلک مرحبا عشقیوه عاشـــقلریوی ائتدون الک مین سپاهه دگر عشق عالمی بو قانلی بلک اصغرون عالمه سلطاندی محرم دهه سی وئر منه گوهریوی غملی آنان گوهری دی گوهرون سیندی ولی الله اونا مشتری دی وئر باسیم سینمه سینم شهدا دفتری دی ئوز نوه مدی اؤ بالا محسنیمون بنذری دی اونا محسنده نواخواندی محرم دهه سی شعر:کلامی زنجانی ┄┅═✼✵✿‍✵✼═┅┄ @goLvazhehaye_asharetorki ┄┅═✼✵✿‍✵✼═┅┄ [[ گلواژه های اشعار ترکی]] ــــــــــــــــــــــــــــــــــــــــــــــــــــــــــــــــــــــــــــ