قصيدة يدفان الشاعر : #محمد_الجماسي الرادود : #ملا_محمد_الجنامی ✨✨✨✨✨✨ دورلي ارض بيهه الحسين وبس الميت لو يطب للحضره يتنفس يدفان وديني يم احبابي يدفان وديني يم احبابي ✨✨✨✨✨✨✨ لو ماكو گاع ابكربله ادفني بحسينيه اقبل ولو نص الصحن تحفرلي بس كاشيه كل عمري ناذرته بچي لحسين والمسبيه الله عجن وي طينتي نص وفه ونص حنيه بالشباك شدوني علگ اخضر وكتبوا إعله الگبر هاذي مرت حيدر يدفان صبعي انوكل بنيابي يدفان وديني يم احبابي ✨✨✨✨✨✨✨ تابوتي افتح خشبته لو يمهم اتوصلني وأقرالي لطميه ونعي بلكي الأجر يشملني گولولهم طاري الهجر وفراگم كاتلني وأدري الحسين ابلا نحر بالباب يستقبلني مو إلا الحسين ابوحشتي يصلي امبارك حتى لو عبدالله يفزعلي يدفان هيلوا عليه اترابي يدفان وديني يم احبابي ✨✨✨✨✨✨✨ حطني إعله ناگه وللگمر عباس اغبش بيه لف الجنازه بسلسله وذكرني بالمسبيه للطف أمانه من تطب والنهر تشرب ميه اصرخ يشيال العلم قد ماتت البدويه ربيته بيديه شلون ينساني اچفوفه امگطعه بيش ايتلگاني يدفان مگلوب صار احسابي يدفان وديني يم احبابي ✨✨✨✨✨✨✨ عباس لو شاف النعش نسوان مابي تصرخ يمكن يسوي بكربله يوم الحشر والبرزخ يم فاطمه الزهره وعلي بوليدي باچر اكشخ عباس يالراسك صعد فوگ الرماح وما طخ آنه ام البنين الما امگمطتك بس لفيت بزنودك حجاب اختك يدفان يم الفرات احجابي يدفان وديني يم احبابي ✨✨✨✨✨✨✨ الميت اذا طب كربله ادري الحسين إيعدله إيرجعله روحه لو دعا وعند الله كلش سهله مشتاگه انصب موكب ازغير اباب القبله الما خادم ابموكب خسر من هسه روح وگله واليقره بثوابي الفاتحه انحسبه مثل الخاتم القرآن بالكعبه يدفان هنياله اللذي يدگ بابي يدفان وديني يم احبابي ✨✨✨✨✨✨✨ ي ام البنين اب هالحلم عشتي العمر وأيامه لو عايشه الهذا الوكت چا هم لطمتي الهامه ملايه چا صرتي وعلي وشاركتي هاللطامه والمهدي باچر لو ظهر هم صرتي من خدامه گلبج زينبي وروحچ حسينيه يالمنتظره نسمه تدخل الريه يدفان صلى الوفه ابمحرابي يدفان وديني يم احبابي ✨✨✨✨✨✨✨