اربعین زبانحال حضرت رباب س آفت هَزارین اِیتسه خزان لاله زارینی درد و اَلم آلار اورکیندن قرارینی باخدوقجا اوز سولان گولونه بلبل حَزین اِیلر چمنده صبح و مسا ناله کارینی وار حکمتی بو مسئله نین روزگاریده بلبل اودور که ترک اِیلمز گول جوارینی جَبراً اگر آیرسالا گولدن او بلبلی ناچار اولوب سالار دیله هجران شرارینی گَلدی اورکده مقصد و منظوریمی اَله بیر غنچه گولده آلدی ربابین قرارینی دائم دیردی قید اسارت قوتارمادی من تا آلام او قبر شریفین کنارینی طوف اِیلیم مزار حسینی زمانه ده دنیاده چَکمیم هامی غملر فشارینی کِچدی غرض خرابه ده بیر مدت مدید درک اِیلدی دوباره او محنت دیارینی سالدی اوزون مزار حسینه نوایله اَلده بهانه اِیلدی اوز شیرخوارینی اصغر ددی دویونجا حسینه بیر آغلادی آچدی مزاری اوسته گوزون آبشارینی دوندی مخاطب ایتدی علی اصغرین رباب سالدی خیاله درد و غم بی شمارینی سَسلندی ای آناسینی آغلار قویوب گِیدن ترک اِیلمز بو نوعیله هیچ یار یارینی یِتدی او دم که سمعیوه هَل مِن مُعین یار گوردون بصیرتیله غم آشکارینی گَلدون نوایه، آلدی سَسون خسرو حجاز نای غمیله ساز اِیلدی هنگ تارینی آخر بو چولده قانه بَلشدون قئیتمدون عرشه اوجاتدی بی کس آنان آه و زارینی دریا قوتولمازیدی سو ویرسیدیلر سنه آغلاتمازیدی کرب و بلا شهریارینی سَندن صورا آچیلدی فراتین یولی او گون گوردوم سو کاسه سینده سَنون گلعذارینی اِیچدیم نه اِیچدیم اِیله بیر اود دوشدی جانیمه گوردی او سو حیاتیمین انجام کارینی بیر قانلی سود بو چولده گَلوب دولدی سینه مه اوزگه بیر حاله سالدی بو غملر دچارینی سَسلردیم ای آناسینی گوزدن آتوب گِیدن سَسلور آنان هراینه پروردگارینی آلسان اگر منیم سَسیمی دادیمه یتیش گل گور یانان چادردا غم جانشکارینی احوالیمه او لحظه منیم عمّون آغلادی یاندوردی درد و غم، جگر داغدارینی بی کس آنان مزاریوی اوندا تاپانمادی ایندی قویوب مزاریوه اما عذارینی گوز کاسه سینده یاتما اویان سو گتیرمیشم ای اوچ پر اوخ خزان اِیلین نو بهارینی قربان اولوم بوغازیوین اول اوخ یاراسینا من گورمدیم او حنجر بس زخمدارینی احوالیوی بیان اِیلینده علی قیزی دردون احاطه ایتدی دل بردبارینی درد و غمون یقین آناوی غصّه مرگ اِیدر چوخ چَکمَسن بو بیر خبرین انتظارینی قویما بقیه عمروی چوخ فوت اولا #عتیق یاز نوحه آغلا عرشه اوجات آه و زارینی