استمداد حضرت ابوالفضل (ع) مرحوم عابد تبریزی . تعجیل ایله گلماقدا اماندور آتام اوغلی سندن اورگیم چوخ نگراندور آتام اوغلی . عفو ایله بو دعوتده اگر اولدی جسارت اولسون قسم اوز جانوه خواهشدی نه دعوت احسان ایله بو خواهشیمی ایله اجابت گل باشوه عباسی دولاندور آتام اوغلی . تا گوز آچوب احساس ایلدیم گوز نَدی قارداش خورشیدیله مَه یا گئجه گوندوز نَدی قارداش نطقه گله‌لی درک ایده‌لی سوز ندی قارداش عبّاسه آدون ورد زباندور آتام اوغلی . یوخدور نظر الفاظیده سنسن هامی منظور سن دلده بیان گوزده ضیا باشدا اولان شور گوز چهره ‌وی ترک ایتمدی، گوردون شب عاشور هرگز دیمدی باغ جناندور آتام اوغلی . عادتله یانان قلبیم ایدوب اسمیوی تکرار خشکیده زبان ایتدی اورک دردینی اظهار عشقون که منی ایلدی بو خواهشه وادار ذرّات وجودیمده نهاندور آتام اوغلی . عشقوندی فقط قلبیده یوخ اوزگه تعلّق بو خُلقله نفسیم تاپیب اوّلده تخلّق گَل گَلماقیوا ایت گیله عباسی تصدّق هر بیر قدمون ارزشی جاندور آتام اوغلی . جان فدیه ی یار اولماسا خدمت دیماق اولماز باش بذل نگار اولماسا عزّت دیماق اولماز سودای محبّتدی مصیبت دیماق اولماز هر غم منه تهذیب رواندور آتام اوغلی . بیر حرف زبانیمده منیم یوخدی گلایه خشکیده لبیم خنده ویرار موج بلایه امواج بلادور یِتورَن اوجِ ولایه بو امر، مسلّم نه گماندور آتام اوغلی . من لازمیدی فدیه ی جانان اولام اولدوم لب تشنه ره یاریده قربان اولام اولدوم سو اوسته سوسوز قانیمه غلطان اولام اولدوم سندن ولی دل چوخ نگراندور آتام اوغلی . مین‌لر من اولام بیر نفسون قیمتی اولماز گل اولماسا هرگز چمنین نزهتی اولماز سنسیز بو جهان اولسادا خاصیّتی اولماز بالّهی جهان سنله جهاندور آتام اوغلی . سینم سپر ایستردی اولا تیر بلایه تا یتمیه گنجینه ی اسرار خدایه افسوس دوشوب توپراقا ایندی بو وقایه هر چند گنه تیره نشاندور آتام اوغلی . دردیم بودی، سن بی‌ مدد و یاور و تنها بو دشت کمین گاه و کماندار سراپا ایوای، نشان بیر، یارالی تشنه لب، امّا دنیا دولوسی تیر و کماندور آتام اوغلی . آخِر نفس احساس ایلورم عمره علاقه ایستور منی توش ایتسون اجل درد فراقه بیر لحظه بُلورسن دوشه گر سندن اوزاقه عباسین او دم حالی یاماندور آتام اوغلی . گُل یاره ‌لر ایلوب بُلورم بو چولی گلشن امّا ندی بو منظر گلگون گورورم من آیا هامی دنیانی دوتوب سوری و سوسن یا آینه ی چشمیده قاندور آتام اوغلی . یازدی خط خونین، ورق جسمیده شمشیر گُلواژه ی عشق اولدی گوزل طرزیله تعبیر دنیا بویی گویادی بو تعبیر و بو تحریر اهل دله تبیان و بیاندور آتام اوغلی . دیداریویله دل یتر آخر بلی کامه توفیق تاپار جان بُلورم اخذ مرامه عطرون گَتورور باد صبا پیکی مشامه انفاسی اودور مشگ فشاندور آتام اوغلی . مأنوس اولالی عشقه ازل، خامه ی تقدیر دل صفحه سینه عکس رخون ایلدی تصویر عشقون منه جان مونسی دور منده نه تقصیر سنسیز گر ایشیم داد و فغاندور آتام اوغلی . قان سیل کیمی موج ووروب داغ داشا قارداش بیر ورطه دی بو غم چولی باشدان باشا قارداش قان قویموری قارداش یتیشه قارداشا قارداش غَرقاب، کران تا به کراندور آتام اوغلی . بو طایفه دنیایه آزوب دینینی ساتدی باشدان هوس باطله حق فکرینی آتدی هر چند که ظاهرده اوز آمالینه چاتدی هر سود، بو سو داده زیاندور آتام اوغلی . نفسیم اولالی نعمت تکوینیله مأنوس اولدوم سنه خادم، سنه چاکر، سنه پابوس آخِر نفسی ایلمه مشتاقیوی مأیوس لطفه بُلوسن یاخشی زماندور آتام اوغلی . دل روشن اولوب آتشِ جانسوز جگردن چوخ فیضه یتوب ناله ی شب، آه سحردن دوشموب بُلورم ناله، دعا، آه، اثردن دیدارون او تأثیره نشاندور آتام اوغلی . ای بارقه ی رحمت بی‌ منّت داور ای جودِ مجسّم، کرم و فیض مصوّر تنها نه منم لطفیوه محتاج، برادر محتاج سنه کون و مکاندور آتام اوغلی . قان آیت نصرتدی بو قانلی علمونده دل هدیه ی ناچیزیدی تشریف غمونده باش نقده نثار اولماسا خاک قدمونده جان دوشینه بیر بار گراندور آتام اوغلی . #عابد سنه دم ویردیله #ذهنی و #سخاوی چون ذکر مصیبتده او شاعر دی بو راوی تکرار ایله اوّل سوز اولوب چوخ سوزه حاوی تعجیل ایله گلماقدا اماندور آتام اوغلی

دور یاتما بو قان ایچره اماندور آتام اوغلی قارداش غمی قارداشه گراندور آتام اوغلی . امدادیوه ایندی منی سن سسلمدون بس گَلدیم گوزون آچ بیرده منیم ویر سسیمه سس آچ گوزلرووی گور باشون اوستونده بو بی‌کس کیمدور که سنه ناله کُناندور آتام اوغلی . یاندیم سنی من نزع روان اوسته که گوردوم تیر اجلون راست نشان اوسته که گوردوم بیر حالته قالدیم سنی جان اوسته که گوردوم باخسان ئولوم آثاری عیاندور آتام اوغلی . قان ایچره خسوف ایلدی تا ماه جمالون آغلار گوزومه عالمی تار ایتدی ملالون هر قدر وارام دلده موثّردی بو حالون شُغلوم سنه فریاد و فغاندور آتام اوغلی . گورکیم گوروب عالمده بیله حال غم ‌افزا سو اوسته بو حالیله سوسوز جان ویره سقّا سن گیتدون اوزون، قالدی دلیمده آدون امّا هر لحظه منه ورد زباندور آتام اوغلی . گیتدون دیمدون قارداشیمون دشمنی چوخدور یالقوزدی اوغولسوزدی داخی کیمسه ‌سی یوخدور قارداش چاغوراندا سسیمه سس ویرن اوخدور ایجاب ایدنیم تیغ و سِناندور آتام اوغلی . هم دردیمیدون آگهیدون درد دلیمدن گیتدون ایلیم آرخام الیمی اوزدون ایلیمدن کسگین قلجیم دوشدی بوگون قارداش الیمدن واضحدی بو مطلب نه نهاندور آتام اوغلی . دشمن یری‌ وار یانسا بو احوالیمه قارداش امّا دیمورم باخ منیم اوز حالیمه قارداش رحم ایت گوزی یولدا قالان اطفالیمه قارداش جام اَلده تمامی نگراندور آتام اوغلی . نولدی سنه سو وعده‌ سینون فکرین آتوبسان بیر مشک سو اوسته سو کیمی قانه باتوبسان ضعف ایلموسن قان آپاروب یا که یاتوبسان دور قارداشیوین حالی یاماندور آتام اوغلی . بو آز سپهیله که علمداریمیدون سن بُلمزدیله مغلوب منی لشکر دشمن گیتدون کیمه بس تاپشوروم آیا عَلَمی من بیرق سپهه عُمده نشاندور آتام اوغلی . سرداریمیدون سن منیم ای کان شجاعت سندن الیمی اوزدی بو بی رحم جماعت صبر ایله دالونجه گَلورم منده بوساعت تاخیریده یوخ خَیْر زیاندور آتام اوغلی . تا اَلده اَسَردی علمون پرچمی عبّاس ایتمزدی باجون زینب اسارت غمی عبّاس امنیّتیدی عترتیمون عالمی عبّاس سنسیز اولارا سخت زماندور آتام اوغلی . جسمون سو کنارینده سنق زورقه بنزر دور سالما بو گرداب خطرناکیده لنگر چک ساحله، طوفانه دوشوب آل پیمبر دریای بلا موج زناندور آتام اوغلی . سن خطّ وفا سیرینی اتمامه یتیردون مقصوده یتوب دشمنیده کامه یتیردون من بی کسین امرین او سرانجامه یتیردون مقصود دل شمر و سَناندور آتام اوغلی . تا قولّاریوی مثل قلم قدلدی شمشیر لازم گوروب آیات وفا شرحینه تفسیر قانیله نچه کلمه یره ایلدی تحریر هر کلمه سی مین شرح و بیاندور آتام اوغلی . ای تَرک سر و جان نه صداقتلی جوانسان پروانه کیمی شمع محبّتده یانانسان آخِر نفسونده گینه مندن نگرانسان حاشا نظرونده سر و جاندور آتام اوغلی . نه قارداشیدون من بُلورم اوزگه ‌سی بُلمز مین عالم اولا عالمه مثلون داخی گَلمز بیر قدّی که قارداش ئولومی بوکدی دوزلمز بو مسئله مشهور جهاندور آتام اوغلی . دورت قارداشی بیر گونده ئولن قارداشون حالی نه حاله قالور اهل دل ایستر اولا حالی بِخصوص کُمَکسیز قالالار اهل و عیالی بیر یرده که وحشتلی مکاندور آتام اوغلی . شل اولسون او اللر که صول و صاقیوی سالدی بـو اللری کسدی قولومون قوّه ‌سین آلدی سندنصورا دردیم چوخالوب چارم آزالدی گوزدن جگریم قانی رواندور آتام اوغلی . هانسی ستمیله ئولن آیا سنه بنزر سیننده چاتوب باش باشا اوخ مخزنه بنزر جسمون باخورام بیر پوزولان گلشنه بنزر باشدان باشا پامالی خزاندور آتام اوغلی . از بس اوخی اوخ اوسته ووروب لشکر اعدا جسمون پر آچوب بس هانی شهپرلرون آیا ای اوج رشادتده هنر صاحبی عَنقا همّت گونی وقت جَوَلاندور آتام اوغلی . غم چکمه اَلون یوخ سیله‌ سن قانی گوزوندن من سیلّم اوزوم حالیووه چوخ یانّام اوزوندن قول بوینووا سالاّم ئوپرم قانلی یوزوندن وار اوزگه مرامون گینه آندور آتام اوغلی . #ذهنی که ایدر ذکر مصائب یازار اشعار امر ایله شها دوتسون الین قولسوز علمدار آگهسن اوزون لیک قیل عبّاسیوه اظهار مقصودی زیارت نه جناندور آتام اوغلی