داغلدی گلشن و گل و باغبان گیدور بو گجه یورولدی بلبل خوش نغمه خوان گیدور بو گجه غراب وردی گلستاندا زنگ تعطیلی هزاره ایلدی ترک آشیان گیدور بو گجه نه یارلرده وفا گوردی نه وطنده صفا نگار قهریله دامنکشان گیدور بو گجه ایگرمی سگیزیدور گوییا مه رجبون مدینه ده گویه یردن فغان گیدور بو گجه هره بیریله خدا حافظ ایلیور اما حسین بقیعه طرف باغریقان گیدور بو گجه وطندن ال چکوب اما بقیعدن دویمور توکور عذارینه اشک روان گیدور بو گجه دیمه او گیزلین اولان قبره ایندی کیم گیده جک حسین یرینه امام زمان گیدور بو گجه بقیعی ایندی او شه ذوالفقار الینده گزور حسین گیدن یولی قلبنده قان گیدور بو گجه حسین بقیعده آغلور حرملر ایولرده سپهره زمزمه ی الامان گیدور بو گجه گلور ولی هر کیم گوره علیله صغرانی سولان جماله باخان ناگران گیدور بو گجه ولی اونوندا گوزی اکبرون دالیجا باخور نشان ویرور که او گیتدوقجه جان گیدور بو گجه اوغول آناسینا ایلور اشاره قویما گیده او گیتسه دلده کی تاب و توان گیدور بو گجه دورانمورام ایاقا سسله ویر الین الیمه طبیب الینده تب جانستان گیدور بو گجه ایشیقلانور ساتاشاندا گوزوم قرا گوزونه بو گوزلریم ایشقی ناگهان گیدور بو گجه گیدور امیدیم الیمدن نه کول توکوم باشیما قبیله ده هامی خویش و کسان گیدور بو گجه اورکلنوب دیدی ایکاش گیتمیه عمم دیدیله جمله بنات و زنان گیدور بو گجه دیدی دیون باباما اکبریم وطنده قالا دیدیله لیلیه روح و روان گیدور بو گجه دیدی قویون عموم عباسی شهر یثربده دیدیله خیمه لره پاسبان گیدور بو گجه دیدی سکینه منیم خاطریمی چوخ ایستر دیدیله زنگ شب کاروان گیدور بو گجه دیدی رقیه نی گوز اوسته ساخلارام قالسا دیدیله اصغره لای لای چالان گیدور بو گجه #استاد_منزوی_اردبیلی