گِردِنه سر ته باز کلیِ قِربون خِنه دارنی کل به کلیِ قِربون سه طایفه کِجور نِمور و مِخری دارنی زرشک دار و هلیِ قِربون #شعرتبری #گردنه_سر #هادی_اکبری_وسطی_کلایی 96/6/17 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی " یادش بخیر " : مه دیار مه آرزو یادش به خیر ملک سرسبز گزو یادش بخیر سبزه زاره بی قرار ه مه لفور بهار ما بک و بو یادش بخیر سرزمین سبزه ها یادش بخیر لت و لتکا و دیما یادش بخیر گالش و چپون جمع ورکا چلی و تور و کوما یادش بخیر این همن تا اون همن یادش بخیر لفور دشت و دمن یادش بخیر گلناز و گلتاج و مشتی گلبرار مله مشت جانمو یادش بخیر بهار ما بک بو یادش بخیر جت و اذال و بلو یادش بخیر خرمن مکری و کمل بار قزل و کهر یابو یادش بخیر مله سر دلخشی یادش بخیر اون قدیم عاشقی یادش بخیر شو شونیشت قدیمی با صفا پشت زیک کنس ترشی یادش بخیر این هدار تا اون هدار یادش بخیر کوچه و کت و دیفار یادش بخیر شوپه وتش کله و دشت نفار های های جان مار یادش بخیر لال انه لال انه یادش بخیر سال اتا بار انه یادش بخیر آبی قدک دار انه های های پار بورده امسال انه یادش بخیر مله کور کور کور سو یادش بخیر دس چراغ و دس سو یادش بخیر سنگ فرش کوچه و کت و دیفار لوش مار و کل چو یادش بخیر ایها نه فصل بهار کوچ بار زنگ تال گوپنو یادش بخیر چاخنی آزون سر و دارزنون موزین دم زنون یادش بخیر گل تاج گلناز و مشتی جانعلی مله مشت گل عمو یادش بخیر یار علی و گزعلی و جانعلی مله مش جان ببو یادش بخیر (( آری براستی زمان که می گذرد آدمها که می میرند اسم ها می میرند رسمها می میرند سنت ها فراموش می شود عادت ها محو می شود پس یادش بخیر شعر از مرحوم #اسدالله_کجوری_نفتچالی #شعر_مازندرانی #شعرتبری 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

#شعرتبری #مه_دل_تنگ_گینه مه دل تنگ گینه اون لاکوم کوئه دیاری مازرونِ شهر سُوئِه ونه سوزی، وِنِه چَنگِل، وِنِه آش وِنِه شیر و وِنِه راغونا، دوئِه جُونکای چِمِر، اَسبون شِرنِه صدای زنگ و تالِ اسب و گوئِه مه دل تنگ گینه مِه لاکومِ وِسِّه سیال دار و خال و سنگ و کوئِه دِشاخِ سنگِ سر، سَر بِشتِمِه دل دَوِس دارمه نفس، ماسکویِ اُوئِه مه دل تنگ گینه، مه جانِ لَپوره ونه پاپِّک، وِنه اوجیِ بوئِه لَپوریمه، شِه شرِگای بلاره بگردم اَی من اون لاکومِ شوئِه مه دل تنگ گینه وَختی دَرمه شاهی دیاری دَس تکوم دِمه وَسوئه ✍ حجت‌الله حیدری سوادکوهی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر تبری " اون قدیما "  نیمایی مازندرانی اون قدما همه چی دیه شه جا هرکه شه مرز رج سر شیه راه مهربونی چش پیش دیه ته دی بزونه بوردنه اون خاطره سازون،  چی بموندسه بوینم دکفم یاد قدیما؟ اون قدیما امه صحرا که ونه دار چلا چو شیه تا عرش خدا دس به دعا خاطره داشته دارسر بلبل حونش ونه ور کوکی ی کو کو همه باهم گتنه هسنی و قصه، امه داشتی و نداشتی، امه افرا امه اون سبزه ی وسه. قصه ی کاوه وضحاک وفریدون قصه ی شاه پریون، قصه ی قارن و وندا امید امه اسپهبد قصه،مازیار ، شهریار امه وسه امه بلبل امه قصه،امه محله،امه غرسه امه وسه،غلطه؟ دشتِ صحرا بیه شوکای پرش کل وبز، زرد پلنگ و اش وورگ و خی وشال، همه باهم تتنه. پیته صحرای میون گوی چمر لم و لتکا بیه ایای مجش بهاره کرده تیرنگ ونوشه مشت گلام اوجی ی بو کیله لو کرده سلام خار خارک اون گوشه نیشت بیه زولنگ سرسم بو دیاری دا تره ونگ داربن ،سنگ میون، کوه دله، در زوئه او، چشِ اسلی ی واری کته روش، کشیه راهّه شیه بابل دوش شیه این ور اون ور اموئه راسه تلار، راسه هراز، راسه تجن شیه سجرو ،  همه تا ، بال به گردن شینه دریوی کشه. گوفراوون بیه صحرای میون هرکسی خواسه شه وِرداشته کتول شیرو سرشیرو کره منزل سر فتّ و فراوون گوجمر، تال صدا ونگ تلا ،  دم به ساعت اموگوش جنگل و محله مره یادسه امه کو-لاکوم - سنگرج،لرزنه ور تا به سرین، لیندو الاشت، کنگلو گردن سر، سمت چرات  تا رجه باُ کل سوادکو همه ی کوه و کمر،  تاته چش کرده کنار،  گسفن و گوکرده چرا همه جا بع بع و مع مع بیه مشت للـه وا کرده صدا همه ور چرده فراوون همه ور مشت علف بزو گسفن، گوی انگل پر شیر کی شیه پوسه ی وسه کی شیه مغزه ی وِر؟ هج کسی دارره نزو بزو بو اتا دِ تا ده تا قتل عام؟! نا ولله ناهرگز،که خدا شاهده دونه. اون قدیما  همه دونسنه که جان خدا وینه وشونه. زندگی نوج زوئه صحرا دله مثل این نخشِ علف اون دره په زندگی نوج زوئه افرای واری وختی مه جان سواد کو انه یاد وختی که ویمه غم وغرسه همش کمه کوفا اتا مر نانه چیه دل درد شندنه پت پت اسلی دِتا چش، سخته مره زندگانی خله خاره اگه ته دل بوه خش فکروذکرودل وچش بوه درس مشت ایمون بوئه دل آدم دس برسه تاونه تک. اون قدیما سر شو ماه ، مثل هر دورو زمون شه زونه دائه یور کم کمک لشته سیوئی ره درس ستاره در امو این ورون ور زوئه سوسو زوئه چشمک آسمون مثل کهوجل ونه تن تیب تیب میرکا کشکشون هم زوئه خنده اگه دل دی بو امید اون قدیما همه چی دَ یّه شه جا بئو شال یا به قولی روک شال زوزه زوئه گتنه ای کی بمرده؟! وک غرغر اموئه دشت روآر دل وس سک لوئه کرده دیاری بوی نون پیتئ نماشون همه ور همتی بوی پلا چاشتِ گدر خنه سر هیمه ی دی خورِ مردم دینه مدام ، ورده تا عرش خدا همرکت داشته شه پرکای دله اتا کم برمه واره دل گب خیلی فراوون سه چهار پنشتاگوآل شکرو عبادت دی یِ همرا نداری مردم جا داشته رفاقت مردمون درونِ سر گب زونه باهم گتنه ایل و توار خورو پاکی ی شه اصل و نسبّه. سره سر ناشته حصار ناشته پرچیم و پرن،     هنّ و هلوم ، لوش و کلک کوچه سر، تیل و تپیل، دسّ وپه مثل چچیکل فنی زک درائیت اموئه لوشه ی پشت. پیر مردا بینه گت پر،گت پا،دایی عامی پیر زن ها همه گت مار، خاله،عمه،عامی زن یا دای زن ، یا دوسّی سک وسول دای وچه ، عامی وچه یا خرزا برازا همه همدیگر خواهون، همه همدیگرفامیل، محرم شه فقیری ره رسد کردنه باهم شه میون دین و ایمون چشِ پیش دیه ته شه دی. مثل راسّی یُ صداقت مثل افتاب، یاهمون جنگل جور، سبزه ی جور شه نمازه همه خوندسنه بادل پاکی شینه تا اهل قبورفاتحه خون تکیه سر سینه زنی هرکه داشتبو شیه مشهد پاندا بو شینه عبدالحق زیراب سوادکو شینه آ مل شینه ساری خواسّنه عرض ارادت هاکنن نسل رسولّه شه نبی ره شه وصی ره وشون زا و زکاره شه امامون ریکاره،حضرت فاطمه زهرای بتولّه مردم دل بیه دریای واری پاک وزلال مثل مازرون واری سبزو وشا، اون قدیمای خور درگمه نا این گدره. خله حرفسه نداشتی ی دله دس و دلبازی ومردانگی و عزت نفس. اره انتی بیه اون دور قدیم  ونه بوردن که جهان جای عبوره منا ته هرده ی جا یک وجه گوره چه که این رسم زمونه اون چه اون خاطره هاره و نه مه یاد بیاره بزونه بوردنه هیاهیا وختی مریادانه اون دوروزمون غرسه میهای واری نیشته مه جان و دل سر چش اسلی انه یور روش کشنه، جر انه تب تب بیصدا  راسّی راسّی چی بموندسّه بوینم دکفم یاد قدیما؟!        25/4/1373 #حجت‌الله_حیدری‌سوادکوهی #شعرتبری #شعرمحلی_مازندرانی #شعر_نیمایی_مازندرانی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر محلی مازندرانی درباره #بهارمازندران      #قصیده گونه_مازندرانی ورف نفس بن بمو درانــــــــه لس لس بهار اون شونه باغ ولته این شونه دشت و روآر پس بزو اسپه میـــــــا بوردنه سرخ و سیو بیه قلــــــی آسمون هسه دیــــــــاری دیار اون سرکــــــــو ورف او دریوره کنـه هدار کف بـــــزه دریـوی او روش کشنه تا کنار برمه گلی ورف ویخ خنـــه زنون گل تتی این وره بلببل سروش اون وریــه غارغار ممرزبن زنجیلک خوند نا سرسر تیکا این گله بن نرتلا اون گله بن کـرج مار نوج بزو اسپه تتـی لالــه بمو سرخ تش مثل طلا زرد گل سید جــل سبزه جــار نا دمشه نــا اوزر ناخــــورِ ورف ویخ نا اثـــــرِ لرزو تو نا بونــه ته دس کتار گل همه رنگی دره بو انه صحرای ور غنچه همن تا همن سبزه دوس کوهسار بلبل خونش انه دشت زمون گـــــــوش بن درسه عسل ماز کـارهی تجنه هشت وچار فصل بهــــــاره ننیش موقع کـــــاره ننیش دون کــه هنیشتن نیه این گدری تِسّه خـار کایّرسر هـــــرکسی بادل و جـان کنه کار اته بونه دسمره اته دیگــــــــر چاشت یار غرسه ره شه دل نکن خنّـــــه ره شه دیم دکار من که تره دارمه دوس پس ته چه نی مه برار؟ فصل بـهــاره اســا موقعِ  کـــــاره اسا فکر زمسون دواش هسـه اسا وخت کار گالش دوش تورکله کـاسب دوش سـر بلو اون شونه‌شه چرده‌گیر این انه شه تیم جار قــــد بلاره ببـــو برکت دسِّ گـــــــره  گوره بَور گوخسون گوکه دون کل تلار کـاسب د سُّ بلومعجــــز عیسا دنه مرده پلوج زمین  زنده درانه شوآر عشقه امه بینجِ تیم عمره امه بینجِ جار فصل بهارسه هی تیمه زمی سر دکار فصل بهاره برارغرسه ره بهلین کنار بل برسه آسمون شونگ وشِوَنگ وهوار غرسه نخر نرزنه عمره هدی غرسه ور ای اگه باشه بهارسبزِ جمه خشک دار حجت مازندرون نشته شه ســـر ادعا کنه به شه مردم وگــــــویش جا افتخار     26/3/1339 #حجت‌الله_حیدری‌سوادکوهی #شعرتبری #شعرمازندرانی #بهارمازندران #قصیده_گونه 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر محلی مازندرانی " راسه نمیر بهار انه " :      #قصیده_گونه_مازندرانی هوشته مره پلای سر گنه تنٍ نگار انه سفره ره جم نکن نَوِر، یاره سرٍ نهاراِنـه در‌ انه دس پا هکن بور همه ره صدا هکن چکه بزن سما هکن سرزده باوقار انه تشته بَور لگن‌بیار طبل و دِ سَر کُتن بیار دشمن وٍرکفن بیار بُورده ی پار پِرار انـــه دهره بیارگلن‌بزن گـو ره بَور همن دَون  خارک پیرهن دَکِن یارٍسمن سوار انـه لمتک و متکا بیارکاسه و پیله‌کـــا بیار بزکل و جونکا بیار مظهر کــردگار انه زهره انه روجـا انه نقــره انه طلا انه خنده انه صفا انه جلوه ی شام تار انـه لینگٍ نشون گنه انه دسّ و دهون گنه انه  دور زمون گنـه انه  بلبلٍ بی قـرار انه اسپه میاره با نرو وارش و واره با نـرو سردٍ هواره با نرو چـرده دوسه دار انه حجله نشین هلی‌ره باُ ممرزو ولولی ره باُ پج بدا انجلی‌ره باُ ککی و ککی‌مار انــه غرسه نخر سوا انه روز دهـــون الا انه یاره؟ بئو خدا انه دلبر غرسه خــوار انه چله شونه میا شونه وارش وورف ووا شونه چکه شونه سما شونه یاره تنٍ کنار انـه سبزه پرس چمن پرس درّه پرس همـن پرس مرده‌ی درکفن! پرس چله سـر بهار انه زرد کلاکئـی انـــــه سرخ اَیــی انــــــه ورف دهــــون هئی انــه باغ انه نپار انـه تازه بچا بچاره باُ تــرنه ونـوشه هــاره باُ پهلم وگند یماره باُ سوزی ی سبزه زار انـــه درد انـه دوا انه عشق انـه جفا انـــه برمه وونگ ووا انه غرسه ی بی شمارانـه ظلـــم دره سـتم دره محنت دمبدم دره غم دره گاهه کم دره گاهه هزارهزار انه لالــه همن همن انـه سنبل و یاسمن انه قاصدک چمن انه ســرخ تتی انار انـه حافظ خش سخن گنه عمرٍ دراز ره بخوا راسه نمیر بها رانـه کمبزه باخیـار انه این همه ره‌فنا بوین همّه‌ره جا بجا بوین جای همه خدا بوین عشقه که پایدار انه حجت دل دماغ دور باتـه امید وار باش عمر نٍنه زمون نٍنه گـردش روزگار انـــه. #حجت‌الله_حیدری‌سوادکوهی #شعرتبری #شعرمازندرانی #قصیده_گونه 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر محلی مازندرانی: مه دل دواره  سادگی هاکرده یاد  زمون  وچگی  هاکرده اون زمونا ، دلا همه شاد بینه تموم روستاها ، چه آباد بینه امه مله ، کوچه صفا دهیه مردم دل ، مهر و وفا دهیه قدیما زندگی چه رنگی داشته بلبل دار سر ، چه ونگی داشته یک رنگی و مهربونی دهیه ساز و شواش و مهمونی دهیه قدیما نامردی وجود نداشته هیچ کاجه دلسردی وجود نداشته بازار نامردی شلوغ بهیه روز و شو  امه کار  دروغ بهیه مهر و محبت  کیمیا بهیه دنیا پر از ، رنگ و ریا بهیه رحم و مروتها کاجه بوردنه اون کوه غیرتها کاجه بوردنه بیمی امان ،  بیدرد و غم گرفتار تنگ بهیه مه دل ، نهیرنه قرار برار   برار سر جنگ دارنه کار پی یر جه ، وچا ننگ دارنه پیر سالاری ، ریشه کن بهیه پسر بمو ، غیرتا  کم بهیه جوونا تا ظهر ،  بخاتونه ولله قدر  پیر مار ،  ندونه  ولله بی غیرتی بیه  وفور نعمت مردم گفت و گپ ، دروغ و تهمت ✍  ؟ #شعرتبری #شعرمازندرانی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی: بِلا بَیرِه مِه اِقبالّهِ ؛؛  نِماسِه اَندِه مِه کِر رِه ؛؛ بِهِلین اَتا کَس بِه تا ؛؛ بوشِه تا مِه حِخِه گِر رِه ؛؛ هِوا سَردِه زِمِسّوُنِه ؛ اَئی گِنّهِ بِهار بِمو ؛؛ مِه وَر وَنوشِه سوز نَییِه ؛؛کی بَیتِه اِفتابِ خِر رِه ؟ ؛؛ مِه دِل خوانِه مِنا خواهون ؛؛ دِ تایی کوه بوریم اِمسال ؛؛ هِنیشیم چِکِلِه لو تا ؛ گوش هادیم اِشکارِ لِر رِه ؛؛ لَ لِه تِک آ عصا مِه دَس ؛ پِئی هادِم مِیا رِه تا ؛؛ دِیار بَوّوِه جانِ اِفتاب ؛ بَخوندیم عاشِقی شِر رِه ؛؛ نِفِس بَکشیم بِهارِه کوه ؛؛زِمِسّوُنِم فِرو بورِه ؛؛ مِه اِقبالِه یَخ او بَوّوِه ؛روش هادِه چِشمِه شِر شِر رِه ؛؛ اَمِه تاریکی روز بَوّهِ ؛ روجا شِه خِدّهِ جا بَدِه ؛؛ بَخوندِه دَمبِه صُب بِلبِل ؛؛ مِنا مِه خواهونِه سِر رِه ؛؛ 🌹 دگاردندی بلا بگیره بختمو ؛؛ که نگیره گلومو ؛؛ بزارین یکی بیاد تا ؛؛ باز کنه گره گلومو ؛؛ هوا سرد و زمستانه ؛؛ باز میگن بهار آمد ؛؛ سمت من بنفشه بالا نیامد ؛؛ کی نفس آفتاب را گرفت ؛؛ دلم میخواد منو یارم ؛؛ دوتایی امسال بریم کوه ؛؛ بشینیم لب قلّه تا ؛؛ گوش بدیم بانک شکار را ؛؛ نی لب من عصا دستم ؛؛ ابرها را کنار بزنم ؛؛ نمایان بشه آفتاب ؛؛ بخونیم شعر عاشقی را ؛؛ بهار ماه کوه نفس بکشیم ؛؛ زمستون الهی نیاید ؛؛ یخ بختم آب بشه ؛؛ مثل چشمه روان بشه ؛؛ تاریکی مون روز بشه ؛؛ ستاره صبح جا بخوره ؛؛ بلبل اول صبح بخونه ؛؛ بگه راز منو یارم را ؛؛ ✍ علیرضا رحمانی کوتنایی #شعرتبری #شعرمازندرانی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی : گِمون خِدا تِرِه ، رویا بِساتِه ؛؛ خِجیرآ ، هَمِه چی دونا بساتِه ؛؛ تِرِه پیشواز ، بِهار بِمو پِرِه گِل ؛؛ زِبوُنِ مازِنی ، گویا بِساتِه ؛؛ ✍ علیرضا رحمانی کوتنایی #شعرتبری #شعرمازندرانی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی : تِه دوری یَکدَقِه ، صَد سال رِه مونّهِ دِرازِه شو ، کَهوُ دِل دِل رِه جونّهِ دِتا چِش،،چِش چِشِ سَر نَشونِه خو بی تِه ، مَشتِ اِفتابِ سو رِه کونّهِ ✍ علیرضا رحمانی کوتنایی #شعرتبری #شعرمازندرانی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

#شعرطنزمازندرانی : خـــدا بَوّم رَفِـــــق آواره بـَوّی 🌹 ته گوشی بِشکیه بیچاره بَوی 🌹 اِتـَنّه بوتـــــِمه گوشـی نخامه 🌹 زنای خلقِ خو، جوشی نخامه 🌹 همین یازده دِصفر مه سَرّه وَسّه 🌹 بِخدی زنگِ دس، بَهیـــــمه خسه 🌹 رَفقون بوتنه لمســی چه خاره 🌹 بهار و نازنین،شمسی چه خاره🌹 زنـای پِدپِدی هــــارشن نویــــنی🌹 دِرِس شوڪا دره مارشن نوینی🌹 صِوایی تا نماشون خَنّه بازار 🌹 بسوزه ڪله ی هر مردم آزار 🌹 پر از عڪــسای شاخای مجازی 🌹 همه خِشتیپ مِث ناصرحجازی 🌹 همه باران و هستی و ثمینه 🌹 نَوینّی اتّا صغــری و سڪینه🌹 همیشه خیر و خِش پارتی هیایی 🌹 همه گلشـــــیفته، گلـزار و حیایی 🌹 هلا فِســـــبوکو اینِســتا ره ندی 🌹 هلا شـاگـــردیوُ اِستـــــا ره ندی 🌹 اگه خــــانی اَتی حــوری بَویـنی 🌹 یواشڪ عکسِ اونجوری بوینی 🌹 برو ایـــنترنت و دنــیاره هــارش 🌹 گوش آده شه رفقای ســــفـارش 🌹 خلاصه بمـــومه بیـــــچاره بیمه 🌹 شه ڪم علاف بِمه بیڪاره بیمه🌹 بتیمه زاره زارو لایـــڪ قـــــلبی 🌹 دیاری گوشــت مونه پی و چلبی🌹 نهار و شام سر با جنگ و دعـوا 🌹 دتا لقـــــمه پلا خیــــنه سـره پا 🌹 زنای ونگ و واعو داده بـیـــداد 🌹 گنه مردی تره چه نونه بـِــــهراد 🌹 بَهی چل ساله و ریــڪاره مونی 🌹 تره هرچی بَوِم ســیڪاره مونی 🌹 اســـــا نمه چتی راحت بووشم 🌹 بِله دیگه شه گوشیره دَڪـوشم🌹 رفق بوته خانی راحـت بووشی🌹 بِله شمرِ جِمه ره تن دپـــــوشی 🌹 بِله تصمـیم کبـری ره بعــــیری 🌹 دباره ای جــــوونی ره سَریری🌹 بَخونسـمه شه شعره خَنّه خَنّه 🌹 زنا بیـــــره مـــــره مه سَرِ کَنّه 🌹 اسا تڪلیف چی بونه من ندومه🌹 بڪوشی هم، خِنه امشو نشومه 🌹 ✍ #احمدرضا_احسان_پور_آرا #شعرطنزمازندرانی #شعرتبری 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی مویَه : صدای مویَه ای اِینَه با نارَه بَوِه دل هِنتی یه جِل پاره پارَه یکی بوتَه بَگِردَم قّدِ رعناش یکی دیْ بِرمِه کُردَه با اشارَه همه خویشون ببیمونَه مَغفِرستون بَدینَه مردومی حال چِنتی زارَه دِتَر گیسش کَشیَّه هِنتی ساجَه ریکا دیْ مویَه کُردَه با ستاره پییَر دولا بِیَه هِنتی کمونی گُتَه مردوم دلم ابرِ  باهارَه دَوِی یک کَس که رنگش هِنتی گچ بِیْ آخِی مارِش بَگِردَم بیقِرارَه خاخِر مرثیه گو بِیْ گاه و بیگاه بِرار نازش کَشیَّه از دوبارَه جَوونون فکر خاکی سنگ و لونَه بزرگون بیزِن از این دردی چارَه هَلا صاحب عزایَه دل پریشون دَرَه کُلگایی سر حلوای سارَه چه توفیر کُندَه که وقتی بَمردی کفن از اطلسَ یا چیتِ پارَه هاکُن در زنده مونی خیر و نیکی بَمِردِه آدِمِر شیون به کارَه اگِر دست کسی اَمرو بَییری تو دون پِهرا تِنِر دی برقِرارَه بییِن تا هِدیرایی قدر رَ دونیم رفیق بیکسی انگوشت شمارَه ناکَک بیمو بَرِسّییَه گَلی بِن چِتی درمون کنم دل کَشنَه نارَه هزارون درد و درمونش رفیقَه بییِن با هم  دَووییم فکر چارَه رحیم بوتی نوای درد و درمون گمونم مویَه  دل رَ کُندَه پارَه رحیم  اله وردی میگونی برگردان فارسی شعر مویه (شیون) صدای شیونی آمد با نعره دل مانند پارچه ای تکه تکه شد یکی گفت به قربان قد رعنایش بگردم یکی هم با اشاره میگریست همه نزدیکان به گورستان آمدند دیدند که حال مردم چقدر آشفته است دختر موهایش را همچون جارو میکشید پسر هم با ستاره  شیون میکرد پدر همچون کمانی تا شده بود میگفت مردم دلم همچون ابر بهار است یک کسی بود که رنگش همچون گچ بود آخ،مادرش است،برگردم که بیقراری میکند خواهر مرثیه گویی میکرد گاه و بیگاه برادر نازش را میکشید دوباره جوانها به فکر سنگ های داخل گور و بزرگان چهره در هم کشیده از چاره این بلا هنوز که عزا دار دل پریشان است حلوا را بر روی اجاق آماده میکنند چه فرقی میکند آنگاه که مردی کفن از پارچه اطلسی باشد یا از چیت پاره شده در زمان زنده بودنت خیر و نیکی کن برای آدم مرده گریه به راه است اگر دست کسی را امروز بگیری بدان که پس فردا برای تو هم چنین خواهد شد ببیایید تا قدر یکدیگر را بدانیم رفیق دوران سخت انگشت شمار است نفس به سختی تا زیر گلو میرسد چطور درمان کنم؟دل نعره میکشد هزاران درد است که درمانش دوست است بیایید با هم به فکرچاره باشیم رحیم نوای درد و درمان را گفتی گمان میکنم ناله دل را به درد میاورد #شعر_مازندرانی #شعرتبری #مویَه #رحیم_اله_وردی_میگونی 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید

📝 شعر مازندرانی : هر دردی که مه دلِ درد نَوُونه٬ هرکس سبیل بشته که مرد نوونه٬ بیعار هیچوقت تِ همدرد نوونه٬ تو‌خار که باشی دنیا نامرد نوونه غریبه جا ته سه محله نوونه٬ هر شیوَنگی حِکمِ بِرمه نوونه٬ پیته جِل که تِ تِرمه نوونه٬ هیچ گوشتی گِسفِن قِرمه نوونه هیچ هوایی کوهِ هوا نوونه٬ سوسیس کالباس تِ غذا نوونه٬ جلادِ خنده هم وفا نوونه٬ هیچ دستی مثلِ یار شفا نوونه سیو جِمه دردِ مَرهَم نوونه٬ نامرده یار تِ همدم نوونه٬ هر أشکی که خاطر‍ِ غم نوونه٬ آبرو داره قامت که خم نوونه إستیل کفگیر جایِ کَترا نوونه٬ هر کلاهی نِمَد کِلا نوونه٬ پیتزا جایِ گِرماس پِلا نوونه٬ مستی هم بی چشه شهلا نوونه کالِ أنگور خاره شراب نوونه٬ کاره خیر هاکن بی جواب نوونه هیچ حالی مِه جور خراب نوونه٬ مصنوعی کِرگ گوشتِ کباب نوونه گالشی بدونِ مار مار نوونه٬ هیچ کدبانو مثاله مار نوونه٬ زنِ هرزه که دیگه خار نوونه٬ دَلِه چشه مردی ته یار نوونه عروسی بی چَک و سَما نوونه٬ فَست فود تِ شکم دِوا نوونه٬ أربابِ مزد هیچوقت هادا نوونه٬ هیچ غذا مثله شیرپلا نوونه وِلِ سگ کِتکا هرگز تازی نوونه٬ دل که نخاد هرگز راضی نوونه٬ بی أصل و نسب خاره قاضی نوونه٬ أشِ کا نعیر تِه همبازی نوونه» #شعرمحلی_مازندرانی #شعرتبری 🔰 به کانال اخبار #لفور بپيونديد 👇👇 @akhbarelafoor 👆 با ما همراه باشید